O‘zbekistonda sportchilarni pora evaziga og‘dirib olganlik uchun jinoiy javobgarlik belgilanmoqda

Oliy Majlis Qonunchilik palatasida “Sport sohasida korrupsiyaning oldini olish maqsadida O‘zbekiston Respublikasining Jinoyat kodeksiga qo‘shimchalar kiritish to‘g‘risida”gi qonun loyihasi birinchi o‘qishda konseptual jihatdan ko‘rib chiqilib, qabul qilindi.

Mazkur qonun loyihasi bilan Jinoyat kodeksining ayrim normalariga o‘zgartirish va qo‘shimchalar kiritilmoqda. Ya’ni sport musobaqalari ishtirokchilari va tashkilotchilarining qonunga xilof ravishda moddiy qimmatliklar olishi yoki mulkiy manfaatdor bo‘lishi, sport musobaqalari ishtirokchilari va tashkilotchilarini pora evaziga og‘dirib olishi uchun jinoiy javobgarlik belgilanmoqda.

Mazkur qonun loyihasi 2023-yilning dekabrida O‘zbekistonda ilk marotaba o‘tkazilgan “Korrupsiyaga qarshi kurashish bo‘yicha yuksak xalqaro mukofot” bilan taqdirlash marosimi doirasida Shavkat Mirziyeyov tomonidan belgilangan vazifalar asosida ishlab chiqilgan 2024—2026-yillarga mo‘ljallangan “yo‘l xaritasi” ijrosi doirasida ishlab chiqilgan.

Deputatlarning qayd etishicha, qonun loyihasining qabul qilinishi milliy qonunchilikni zamonaviy xalqaro standartlar va ilg‘or xorijiy tajribani inobatga olgan holda takomillashtirishga, sport sohasida korrupsiyaga nisbatan murosasiz munosabatni shakllantirishga, barcha uchun javobgarlikning muqarrarligini ta’minlashga, O‘zbekistonning xalqaro reytinglardagi o‘rni ko‘tarilishiga xizmat qiladi.