“Yomon tomonini ko‘rmadim”. Erkin Turdimovning matbuot kotibi Nurobod hokimligi kanalidagi reklamaga munosabat bildirdi

Ijtimoiy tarmoqlarda hokimliklarning rasmiy kanallarida reklamalar berilayotgani, bundan kimdir daromad qilyaptimi, bu pullarni kim olyapti, degan savollar yozilgan xabarlar paydo bo‘ldi. “Daryo” mazkur holatlar yuzasidan mas’ullarni savolga tutdi. 

Samarqand viloyati hokimligi axborot xizmati rahbari Manuchehr Mirzayev Nurobod tumani hokimligining rasmiy Telegram kanalida e’lon qilingan, keyinchalik o‘chirib yuborilgan parfyumeriya mahsulotlari haqidagi matnga munosabat bildirar ekan, “yomon tomonini ko‘rmadim”, dedi. Va ayni paytda tuman hokimligi axborot xizmati bilan bog‘lana olmayotganini, aniq sababidan xabari yo‘qligini bildirib, o‘z taxminlarini ochiqladi. 

Tadbirkorlikni qo‘llab-quvvatlash bo‘lishi mumkin. Yoxud qandaydir adashmovchilik bilan chiqarib yuborilgan. Ba’zida birortasi matnni bir ko‘rib bering, deb tashlashadi, o‘zim ham shartli refleks deydi-ku, qayta tashlamay kanalga chiqarib yuborish holati bo‘ladi. O‘zi bilan hali gaplasholmadim, lekin kanaldan ham izlab topolmadim, — deydi viloyat hokimligi axborot xizmati rahbari Manuchehr Mirzayev. 

Mirzayevga ko‘ra, u Nurobod tumani hokimligi axborot xizmati rahbarining bu harakatida yaxshiliklarni ko‘rgan.

Boz ustiga tumanda ochilgan tadbirkorlik subyekti ekan. Qo‘shimcha ishchi o‘rni, qo‘shimcha soliqqa tushum, deydi-ku. Masalan, siz va men yaxshi bilgan Qashqadaryoda, Surxondaryo va Samarqandda ham qishloq ayollari ko‘pincha to‘y va tadbirlar oldidan go‘zallik saloni yoki parfyumeriya, bezaklar uchun viloyat markaziga borishadi. Buni aholini xabardor qilish shakli deb ham tushunsa bo‘ladi, — deydi mas’ul.

Keshnews Telegram kanali muallifi “Reklama postlarining pulini kim oladi? Matbuot kotibimi yoki hokimlik? Shahrisabz shahar hokimligi rasmiy kanaliga joylangan post tijoriy xususiyatga egaligi aniq. Sababi post Keshnews kanali tomonidan yozilgan va tekinga kanalga joylangan edi. Ushbu post esa Shahrisabz reklama degan kimgadir tegishli kanaldan bo‘lishilganiga qaraganda, post pullik bo‘lgan”, — deb yozadi.

Shahrisabz shahar hokimligi axborot xizmatining taksi xizmatini reklama qilishiga munosabat bildirgan Ahror Sodiqov bu orqali tadbirkorlar qo‘llab-quvvatlanayotganini aytdi.

Taksi xizmatini tashkil qilgan inson ham tadbirkor. Tadbirkorni qo‘llab-quvvatlash uchun hokimlik axborot xizmati bepul, hech qanday manfaatlarsiz reklama qilib bergan. Bu orqali shahar aholisi va mehmonlariga taksi xizmatida qulayliklar yaratilgani xabar qilingan, — deydi Qashqadaryo viloyati hokimligi axborot xizmati rahbari Ahror Sodiqov.