Prezident raisligidagi yig‘ilishda 1 mln gektar g‘alladan bo‘shaydigan maydon, 508 ming gektar aholi tomorqasi, 260 ming gektar odamlarga bo‘lib berilgan yerlar imkoniyatidan to‘liq foydalanilmayotgani qayd etildi. Bu haqda Prezident matbuot xizmati xabar berdi.
Masalan, 16 ta tuman umuman meva-sabzavot eksport qilmagan. Yoki paxta ekmaydigan 28 ta tumanda eksport ko‘rsatkichlari qoniqarsiz. Ushbu tumanlarda mahsulot yetishtirish, saqlash, saralash va sotish bo‘yicha eksportchilar hamda dehqonlar o‘rtasida kooperatsiya tizimli yo‘lga qo‘yilmagan.
Shu munosabat bilan meva-sabzavot eksportiga beeʼtibor bo‘lgan tuman hokimlari, qishloq xo‘jaligi va eksport bo‘yicha o‘rinbosarlariga qatʼiy eʼtiroz bildirildi. Bu yil hududiy dasturlar doirasida respublika bo‘yicha oziq-ovqat yo‘nalishida 833 million dollarlik 528 ta loyihani ishga tushirish reja qilingan. Lekin 14 ta tumanda oziq-ovqat bo‘yicha birorta loyiha yo‘qligi tanqid qilindi.
2024-yili oziq-ovqat sanoatida kamida 100 trillion so‘mlik mahsulot ishlab chiqarish va 1 milliard dollar eksport qilish reja qilingan.
Lekin oziq-ovqat yo‘nalishidagi ayrim korxonalar aylanmasi uchun mablag‘ ola olmagan, ayrimlari sifat bo‘yicha raqobatga bardosh berolmagan, tejamkor texnologiya o‘rnatmagani uchun tannarx baland bo‘lgan.
Shu kabi, oziq-ovqat yo‘nalishidagi 20 ta yirik korxona xomashyo yetishmasligi, mahsulotiga bozor topish va aylanma mablag‘ muammolari sababli quvvatlarini yarmini ham ishlatayotgani yo‘q.
Mutasaddilar, hokimlar yangi loyiha qilish uyoqda tursin, tayyor korxonalarga ko‘mak berishni o‘ylamayotgani ko‘rsatib o‘tildi.
Izoh (0)