“Ёмон томонини кўрмадим”. Эркин Турдимовнинг матбуот котиби Нуробод ҳокимлиги каналидаги рекламага муносабат билдирди

Ижтимоий тармоқларда ҳокимликларнинг расмий каналларида рекламалар берилаётгани, бундан кимдир даромад қиляптими, бу пулларни ким оляпти, деган саволлар ёзилган хабарлар пайдо бўлди. “Дарё” мазкур ҳолатлар юзасидан масъулларни саволга тутди. 

Самарқанд вилояти ҳокимлиги ахборот хизмати раҳбари Манучеҳр Мирзаев Нуробод тумани ҳокимлигининг расмий Telegram каналида эълон қилинган, кейинчалик ўчириб юборилган парфюмерия маҳсулотлари ҳақидаги матнга муносабат билдирар экан, “ёмон томонини кўрмадим”, деди. Ва айни пайтда туман ҳокимлиги ахборот хизмати билан боғлана олмаётганини, аниқ сабабидан хабари йўқлигини билдириб, ўз тахминларини очиқлади. 

Тадбиркорликни қўллаб-қувватлаш бўлиши мумкин. Ёхуд қандайдир адашмовчилик билан чиқариб юборилган. Баъзида бирортаси матнни бир кўриб беринг, деб ташлашади, ўзим ҳам шартли рефлекс дейди-ку, қайта ташламай каналга чиқариб юбориш ҳолати бўлади. Ўзи билан ҳали гаплашолмадим, лекин каналдан ҳам излаб тополмадим, — дейди вилоят ҳокимлиги ахборот хизмати раҳбари Манучеҳр Мирзаев. 

Мирзаевга кўра, у Нуробод тумани ҳокимлиги ахборот хизмати раҳбарининг бу ҳаракатида яхшиликларни кўрган.

Боз устига туманда очилган тадбиркорлик субъекти экан. Қўшимча ишчи ўрни, қўшимча солиққа тушум, дейди-ку. Масалан, сиз ва мен яхши билган Қашқадарёда, Сурхондарё ва Самарқандда ҳам қишлоқ аёллари кўпинча тўй ва тадбирлар олдидан гўзаллик салони ёки парфюмерия, безаклар учун вилоят марказига боришади. Буни аҳолини хабардор қилиш шакли деб ҳам тушунса бўлади, — дейди масъул.

Keshnews Telegram канали муаллифи “Реклама постларининг пулини ким олади? Матбуот котибими ёки ҳокимлик? Шаҳрисабз шаҳар ҳокимлиги расмий каналига жойланган пост тижорий хусусиятга эгалиги аниқ. Сабаби пост Keshnews канали томонидан ёзилган ва текинга каналга жойланган эди. Ушбу пост эса Шаҳрисабз реклама деган кимгадир тегишли каналдан бўлишилганига қараганда, пост пуллик бўлган”, — деб ёзади.

Шаҳрисабз шаҳар ҳокимлиги ахборот хизматининг такси хизматини реклама қилишига муносабат билдирган Аҳрор Содиқов бу орқали тадбиркорлар қўллаб-қувватланаётганини айтди.

Такси хизматини ташкил қилган инсон ҳам тадбиркор. Тадбиркорни қўллаб-қувватлаш учун ҳокимлик ахборот хизмати бепул, ҳеч қандай манфаатларсиз реклама қилиб берган. Бу орқали шаҳар аҳолиси ва меҳмонларига такси хизматида қулайликлар яратилгани хабар қилинган, — дейди Қашқадарё вилояти ҳокимлиги ахборот хизмати раҳбари Аҳрор Содиқов.