Американинг United Airlines авиакомпаниясининг Boeing 737-800 самолёти парвоз вақтида фюзеляж қобиғининг бир қисмидан айрилди, деб хабар берди Associated Press. Бу ҳолат самолёт Сан-Францискодан учиб келганидан кейин Медфорд халқаро аэропортидаги текширув вақтида аниқланди, дейилади хабарда.
Аэропорт маъмуриятининг маълум қилишича, қўниш хавфсиз ўтган ва ҳеч ким жабрланмаган.
Авиакомпания вакиллари самолёт бортида 139 нафар йўловчи ва олти нафар экипаж аъзоси бўлганини ва парвоз вақтида ҳеч қандай зарар белгилари бўлмагани учун фавқулодда ҳолат эълон қилинмаганини маълум қилди.
Лайнер 25 йилдан ортиқ парвозда бўлган. Ҳозирда ҳолат юзасидан тергов ҳаракатлари бошланган.
Сўнгги пайтларда Boeing самолётлари билан содир бўладиган ҳодисалар тез-тез учрамоқда. Январь ойи бошида Аlaska Airlines авиакомпаниясининг Boeing 737-9 МАХ самолёти тахминан 5 км баландликда ҳавода эшигини йўқотиб, Портленд аэропортига фавқулодда қўнишни амалга оширди. Йўловчилардан ҳеч бири жабрланмаган.
6 март куни худди шу авиакомпанияга қарашли Boeing 737-800 самолёти салонидаги тутун туфайли экипаж ҳавога кўтарилганидан кўп ўтмай Портленд аэропортига фавқулодда қўнишни амалга оширди.
Изоҳ (0)