Toshkentda fuqaro Qizil kitobga kiritilgan cho‘l burgutini sotayotgani aniqlanib, huquqbuzar jarimaga tortildi. Bu haqda Ekologiya vazirligi axborot xizmati xabar berdi.
Unga ko‘ra, 10-mart kuni Toshkent shahar Ekologiya boshqarmasi Yashnobod tumani bo‘limi davlat inspektorlari hamda Yangiobod bozori ma’muriyati tomonidan navbatdagi reyd tadbiri o‘tkazildi. Reyd bozorda Qizil kitobga kiritilgan hayvonlarning noqonuniy savdosiga chek qo‘yish maqsadida amalga oshirildi.
Tadbir davomida fuqaro S.A. tomonidan bir bosh cho‘l burguti sotilayotgani aniqlandi. Holat yuzasidan huquqbuzarga nisbatan Ma’muriy javobgarlik to‘g‘risidagi kodeksning 90-moddasiga asosan ma’muriy bayonnoma rasmiylashtirilib, BHMning besh barobari — 1 million 700 ming so‘m miqdorida jarima belgilandi.
Ayni damda burgutga Toshkent hayvonot bog‘ida tibbiy yordam ko‘rsatilmoqda. Salomatligi to‘liq tiklangach, tabiat bag‘riga qo‘yib yuboriladi.
Ma’lumot uchun, cho‘l burguti zaif, qisqarib borayotgan tur sifatida O‘zbekiston Qizil kitobi, TMXIning Qizil ro‘yxati va CITEC’ning II ilovasiga kiritilgan. Ovlash taqiqlangan.
Izoh (0)