Farg‘ona shahrida 93 tup ko‘chatni ruxsatsiz ko‘chirib o‘tqazgan fuqaro tabiatga 250 mln so‘mdan ziyod zarar yetkazdi. Bu haqda Qurilish vazirligi axborot xizmati xabar berdi.
Unga ko‘ra, Sharof Rashidov ko‘chasidagi qurilish ishlari yuzasidan Farg‘ona viloyati Qurilish bosh boshqarmasi tomonidan o‘rganish olib borilgan. O‘rganishlar davomida “Qirguli” MFY Quruvchilar ko‘chasi yo‘l bo‘yidagi 93 tup 2-3 yillik yosh manzarali daraxt ko‘chatlari fuqaro K.A. tomonidan hech qanday ruxsatnomasiz, o‘zboshimchalik bilan qarama-qarshi tomondagi yo‘l chetiga ko‘chirib o‘tqazilgani, qurib qolgan 4 tup yapon saforasi, 4 tup tol daraxti ostidan kesib yuborilgani aniqlangan.
Huquqbuzarga nisbatan Ma’muriy javobgarlik to‘g‘risidagi kodeksning 79-moddasiga asosan ma’muriy bayonnoma rasmiylashtirilib, jarima belgilangan. Shuningdek, ruxsatsiz ko‘chirilgan ko‘chatlarning ko‘karuvchanligini ta’minlash uchun zarur choralar ko‘rish lozimligi yuzasidan ogohlantirish berilgan va belgilangan muddatda ko‘chirib o‘tqazilgan daraxt ko‘chatlari qurib qolgan taqdirda, tabiatga yetkazilgan 252 296 000 so‘m zarar summasini undirish choralari ko‘rilishi yuzasidan kafolat xati olingan.
Hududdagi qolgan daraxtlar xatlovga olingan hamda viloyat Ekologiya boshqarmasi tomonidan holat bo‘yicha o‘z vakolati doirasida tegishli ta’sir choralari ham ko‘rib chiqilgan.
Izoh (0)