Qozog‘istondan Termizga o‘qishni ko‘chirib berishni vaʼda qilgan shaxs jinoiy jarima to‘ladi. Bu haqda “Yangi O‘zbekiston” nashri xabar berdi.
Maʼlum qilinishicha, Termiz shahrida yashovchi U. Jabborova Qozog‘istondagi oliygohlardan biriga talabalikka qabul qilinib, 1-bosqichni tamomlagandan so‘ng o‘qishini Termiz tibbiyot akademiyasiga ko‘chirishni maqsad qilib imtihon topshiradi. U yetarlicha ball to‘play olmagani sababli imtihondan yiqiladi.
Shundan so‘ng notanish bir kimsa unga o‘qishini tanishlari orqali ko‘chirib berishini vaʼda berib, firibgarlik yo‘li bilan 4,5 ming dollar miqdoridagi pulni qo‘lga kiritadi. U. Jabborova firibgarga duch kelganini tushunib, huquqni muhofaza qiluvchi organlarga murojaat qiladi.
Holat bo‘yicha jinoyat ishi qo‘zg‘atilib, ish jinoyat ishlari bo‘yicha Termiz shahar sudida ko‘rib chiqildi va U. Jabborova foydasiga zarar to‘liq undirib berilgan. Shuningdek, firibgardan davlat foydasiga 25 mln so‘m jinoiy jarima undirilgan.
Izoh (0)