Қозоғистондан Термизга ўқишни кўчириб беришни ваъда қилган шахс жиноий жарима тўлади. Бу ҳақда “Янги Ўзбекистон” нашри хабар берди.
Маълум қилинишича, Термиз шаҳрида яшовчи У. Жабборова Қозоғистондаги олийгоҳлардан бирига талабаликка қабул қилиниб, 1-босқични тамомлагандан сўнг ўқишини Термиз тиббиёт академиясига кўчиришни мақсад қилиб имтиҳон топширади. У етарлича балл тўплай олмагани сабабли имтиҳондан йиқилади.
Шундан сўнг нотаниш бир кимса унга ўқишини танишлари орқали кўчириб беришини ваъда бериб, фирибгарлик йўли билан 4,5 минг доллар миқдоридаги пулни қўлга киритади. У. Жабборова фирибгарга дуч келганини тушуниб, ҳуқуқни муҳофаза қилувчи органларга мурожаат қилади.
Ҳолат бўйича жиноят иши қўзғатилиб, иш жиноят ишлари бўйича Термиз шаҳар судида кўриб чиқилди ва У. Жабборова фойдасига зарар тўлиқ ундириб берилган. Шунингдек, фирибгардан давлат фойдасига 25 млн сўм жиноий жарима ундирилган.
Изоҳ (0)