O‘zbekiston Oliy ta’lim, fan va innovatsiyalar vazirligi litsenziyasi bekor qilingan nodavlat oliygohlar talabalarining o‘qishi ko‘chirilganini e’lon qildi.
Ma’lum qilinishicha, Namangan xalqaro universitetining 6041 nafar va Urganch shahridagi Binari universitetining 173 nafar talabasining arizasiga ko‘ra tegishli nodavlat oliy ta’lim tashkilotlariga o‘qishini ko‘chirish bo‘yicha talabalar ro‘yxatlari tegishli nodavlat oliy ta’lim tashkilotlariga yo‘llandi.
Talabalar o‘z tanlovlariga ko‘ra ariza topshirgan nodavlat oliy ta’lim tashkilotlarida 11-martdan o‘qishlarini rasman boshlashi mumkin.
Nodavlat oliy taʼlim tashkilotlarida taʼlim jarayonini tashkil etish va litsenziya talablari buzilgani bo‘yicha vazirlikka kelib tushgan norozilik murojaatlari asosida tekshirish natijalariga ko‘ra, fevral oyida 6 ta nodavlat oliy taʼlim tashkilotining tegishli litsenziyasini bekor qilish bo‘yicha sudga da’vo arizalari kiritilib, shundan 5 tasining litsenziyasi bekor qilingandi.
Prezident qaroriga ko‘ra, litsenziyasi bekor qilingan taʼlim tashkiloti yoki yopilgan taʼlim dasturida tahsil olayotgan talabalarga o‘qishini davlat va nodavlat taʼlim tashkilotlarining mos va turdosh taʼlim yo‘nalishlari va mutaxassisliklariga belgilangan tartibda ko‘chirish huquqi vazirlikka berilgan.
Vazirlik litsenziyasi bekor qilingan oliy taʼlim tashkilotlarining biror-bir talabasi ko‘chada qolmasligini, barcha talabalar arizasiga asosan o‘qishi belgilangan tartibda boshqa oliygohlarga ko‘chirilishi taʼminlanishini ma’lum qilgandi.
Izoh (0)