O‘zbekistonda “yashil” davlat xaridlarini qo‘llab-quvvatlash tizimi takomillashtiriladi. 18-iyun kuni hukumatning tegishli qarori qabul qilindi.
Qarorga ko‘ra, davlat xaridlarini amalga oshirishda “yashil” davlat xaridlari tizimi joriy etiladi hamda “yashil” davlat xaridlari ulushi 2030-yilgacha bosqichma-bosqich 30 foizga yetkaziladi.
2026-yil 1-yanvardan davlat xaridlarini amalga oshirishda ekologik mezonlar eng yaxshi takliflarni tanlash va tenderlardagi xarid qilish hujjatlariga majburiy tartibda kiritiladi.
Bunda:
- ekologik markirovkalash hujjatining har bir turi uchun to‘plangan ballarning 5 foizi miqdorida qo‘shimcha ball beriladi;
- ishtirokchi taklifining ushbu mezonlarga mos kelmasligi ishtirokchini xarid qilish tartib-taomilidan chetlatish uchun asos bo‘lmaydi.
Bundan tashqari, davlat buyurtmachilarining 2026-yil uchun davlat xaridi bilan bog‘liq xarajatlarda “yashil” davlat xaridlari ulushini kamida 15 foizga yetkazishi, ushbu ko‘rsatkichni har yili kamida 5 foizga oshirib borish bo‘yicha choralar ko‘rishi belgilandi.
“Yashil” davlat xaridlari — bu davlat tomonidan mahsulotlar, xizmatlar va ishlar xarid qilinayotganda ekologik xavfsizlik, energiya tejamkorligi va barqarorlik mezonlarini hisobga olish orqali amalga oshiriladigan yangi yondashuv bo‘lib, atrof-muhitga salbiy ta’sirni kamaytirish maqsad qilingan.
Vazirlar Mahkamasining 2024-yil 20-dekabrdagi qarori bilan “2025–2027-yillarda davlat xaridlari tizimini yanada takomillashtirish va rivojlantirish strategiyasi” tasdiqlangandi. Ushbu strategiyada davlat xaridlari jarayonlarini ekologik barqaror va keng raqobatga asoslangan holda takomillashtirish hamda “yashil” xaridlarning ulushini oshirish ko‘zda tutilgan. Shuningdek, atrof-muhitni muhofaza qilish va ekologik zararlarni kamaytirishga qaratilgan chora-tadbirlar belgilandi.
Izoh (0)