O‘zbekistonda 2023-yilda ro‘y bergan YTHlarning uchdan bir qismi Farg‘ona vodiysi viloyatlariga to‘g‘ri keldi

O‘zbekistonda 2023-yilda ro‘y bergan yo‘l-transport hodisalarining qariyb uchdan bir qismi Farg‘ona vodiysi viloyatlariga to‘g‘ri keldi. Bu haqda Namangan muhandislik-qurilish institutida bo‘lib o‘tgan “Farg‘ona vodiysida xavfsiz harakatlanishni taʼminlash: muammo va yechimlar” mavzusidagi ilmiy-amaliy anjumanda Yo‘l harakati xavfsizligi muammolarini o‘rganish markazi rahbari Mashrabjon Razzoqov maʼlum qildi, deya xabar beradi “Daryo” muxbiri Azizbek Abduvaliyev.

Aytilishicha, 2023-yili Farg‘onada 1310 ta, Namanganda 981 ta, Andijonda esa 766 ta YTH qayd etilgan. Ushbu hodisalar oqibatida vodiy viloyatlarida 575 kishi halok bo‘lgan, 2837 kishi jarohatlangan.

“Vodiy yo‘llaridagi har ikkinchi avariyaga yo‘l-transport infratuzilmasi maqbullashtirilmaganligi sabab bo‘lmoqda. YTHlarning salmoqli qismi piyodalar ishtirokida va haydovchilar tajribasizligi tufayli ro‘y berayotgani achinarli. Andijonda esa har ikkinchi hodisa belgilangan tezlikka rioya etmaslik oqibatida sodir etilgan”, — deydi Mashrabjon Razzoqov.

Namangan viloyatida 103 raqamiga amalga oshirilgan chaqiruvlar tahlil qilinganda ularning 3566 tasi yo‘l-transport hodisalariga hamda har uchinchisi Qamchiq dovoni hissasiga to‘g‘ri kelgan.

Biroq ushbu hududda og‘ir tan jarohati olganlarga malakali shoshilinch tibbiy yordam ko‘rsatish imkoniyati cheklanganligi bois jabrlanganlarni Pop tumani yoki Angren shahar tibbiyot birlashmasiga olib borishga majbur bo‘linmoqda.

Shu bois Qamchiq dovonidagi “Rezaksoy” tez yordam bo‘limida reanimatsion postni to‘laqonli ishga tushirish, Namangan—Toshkent avtomagistral yo‘lida 3 ta tez tibbiy yordam postini tashkil etish choralarini ko‘rish takliflari bildirildi.

“Mazkur anjuman oliy taʼlim muassasasi bilan hamkorlikda o‘tkazilgani bejiz emas. Chunki konferensiya davomida yo‘l harakati xavfsizligi va transport infratuzilmasiga oid muammoli masalalarni muhokamaga qo‘yishdan oldin professor-o‘qituvchilar tomonidan batafsil o‘rganish mexanizmini joriy etish, talabalar o‘rtasida yo‘l harakati intizomi va madaniyati bo‘yicha targ‘ibot tadbirlarni olib borish masalalari muhokama qilindi.

Qolaversa, bugungi kunda institutimiz olimlari tomonidan Namangan shahrida jamoat transporti tizimi va infratuzilmasini takomillashtirish bosh rejasini ishlab chiqish loyihasi amalga oshirilmoqda”, — deydi tadbirga mezbonlik qilgan Namangan muhandislik-qurilish instituti rektori Sharifjon Ergashev.

Konferensiyada vodiy viloyatlarida yo‘lovchi tashishda jamoat transporti ulushini kamida 3 barobarga oshirish, transport vositalarining harakatlanish intervalini qisqartirish, bu borada xususiy sektor vakillari bilan tig‘iz hamkorlikni yo‘lga qo‘yish masalalari ham ko‘rib chiqildi.

Maʼlumot uchun, bugungi kunda yo‘lovchi tashish umumiy hajmida jamoat transportining ulushi Andijonda 25 foiz, Farg‘ona va Namangan viloyatlarida esa atigi 10 foizni tashkil etmoqda.