Vashington Rossiyaning noyabrda bo‘lib o‘tadigan prezidentlik saylovlariga aralashuvidan xavotirda. Bu haqda AQSH prezidentining milliy xavfsizlik bo‘yicha maslahatchisi Jeyk Sallivan axborotiga tayanib, Deustche Welle xabar berdi.
“Bugun men dalil haqida gapira olmayman. Lekin shuni aytishim mumkinki, albatta, xavotirlar bor. Bu yerda Rossiya Federatsiyasi, uning razvedka xizmatlariga tegishli prezidentlik saylovlari nuqtai nazaridan ham sabablar bor. Gap siyosat haqida ketmayapti. Bu milliy xavfsizlik haqida. Gap AQSH siyosati va demokratiyasini manipulyatsiya qilishga intilayotgan xorijiy davlat, xorijiy dushman haqida” — deydi Sallivan.
Jo Baydenning milliy xavfsizlik bo‘yicha maslahatchisi Oq uy saylovga aralashuvning oldini olish va Kongressdagi har ikki partiya vakillari bilan aloqa o‘rnatish uchun hushyor bo‘lishini qo‘shimcha qilgan. Unga ko‘ra, milliy xavfsizlik siyosatdan yuqori turishi lozim.
2023-yil oktyabr oyida AQSH razvedka agentliklari Rossiya o‘zining josuslar tarmog‘i, davlat ommaviy axborot vositalari va ijtimoiy tarmoqlardan foydalanib, saylovlarga jahon jamoatchiligi ishonchini susaytirayotgani haqida hisobot e’lon qilgan edi. Keyin bu hisobot Yevropa, Osiyo, Afrika va Shimoliy Amerikadagi yuzga yaqin davlat elchixonalariga yuborilgan.
Izoh (0)