Вашингтон Россиянинг ноябрда бўлиб ўтадиган президентлик сайловларига аралашувидан хавотирда. Бу ҳақда АҚШ президентининг миллий хавфсизлик бўйича маслаҳатчиси Жейк Салливан ахборотига таяниб, Deustche Welle хабар берди.
“Бугун мен далил ҳақида гапира олмайман. Лекин шуни айтишим мумкинки, албатта, хавотирлар бор. Бу ерда Россия Федерацияси, унинг разведка хизматларига тегишли президентлик сайловлари нуқтаи назаридан ҳам сабаблар бор. Гап сиёсат ҳақида кетмаяпти. Бу миллий хавфсизлик ҳақида. Гап АҚШ сиёсати ва демократиясини манипуляция қилишга интилаётган хорижий давлат, хорижий душман ҳақида” — дейди Салливан.
Жо Байденнинг миллий хавфсизлик бўйича маслаҳатчиси Оқ уй сайловга аралашувнинг олдини олиш ва Конгрессдаги ҳар икки партия вакиллари билан алоқа ўрнатиш учун ҳушёр бўлишини қўшимча қилган. Унга кўра, миллий хавфсизлик сиёсатдан юқори туриши лозим.
2023 йил октябрь ойида АҚШ разведка агентликлари Россия ўзининг жосуслар тармоғи, давлат оммавий ахборот воситалари ва ижтимоий тармоқлардан фойдаланиб, сайловларга жаҳон жамоатчилиги ишончини сусайтираётгани ҳақида ҳисобот эълон қилган эди. Кейин бу ҳисобот Европа, Осиё, Африка ва Шимолий Америкадаги юзга яқин давлат элчихоналарига юборилган.
Изоҳ (0)