O‘zbekiston va Italiya kompaniyalari o‘rtasida 382 mln dollarlik 8 ta loyiha amalga oshiriladi. Bu haqda qishloq xo‘jaligi vaziri Ibrohim Abdurahmonov Italiyaning O‘zbekistondagi favqulodda muxtor elchisi Agostina Pinna bilan uchrashuvida qayd etilgan.
Uchrashuvda vazir O‘zbekiston va Italiya qishloq xo‘jaligi sohasidagi aloqalari to‘g‘risida to‘xtalib, ikki mamlakat o‘rtasida qishloq xo‘jaligi sohasida aloqalar tobora mustahkamlanib borayotgani taʼkidlagan.
Elchi Agostina Pinna ikki davlatning qishloq xo‘jaligi yo‘nalishida amalga oshirilishi kutilayotgan loyihalar haqida to‘xtalib, O‘zbekiston va Italiya qishloq xo‘jaligi vazirliklari o‘rtasida imzolangan Anglashuv memorandumini ro‘yobga chiqarish, Italiya kompaniyalari bilan hamkorlikda umumiy qiymati 382 mln dollarlik 8 ta loyihani amalga oshirish ustuvor masala ekanligini qayd etgan.
Shuningdek, uchrashuvda elchi CIVI Italia uyushmasi Surxondaryoda xalqaro ko‘chatchilik markazini tashkil etishga tayyor ekanligini ham eʼtirof etgan. Agostina Pinna shuningdek, qishloq xo‘jaligi vaziri 2024-yil 8-10-may kunlari Italiyaning Rimini shahrida MAKFRUT xalqaro ko‘rgazmasida milliy stend tashkil etgan holda mahalliy mahsulotlar namoyishini o‘tkazish taklifini bildirgan.
Qolaversa, Italiyaning yirik Bonifiche Ferraresi kompaniyasi O‘zbekistonda qishloq xo‘jaligi mahsulotlari yetishtirishga qiziqish bildirayotgani, ushbu kompaniya investitsiyasi ishtirokida sohada ulkan loyihani amalga oshirish borasida ham fikrlar bildirilgan. Bu taklif Qishloq xo‘jaligi vazirligi rahbariyati tomonidan qo‘llab-quvvatlangan.
Izoh (0)