Ўзбекистон ва Италия компаниялари ўртасида 382 млн долларлик 8 та лойиҳа амалга оширилади. Бу ҳақда қишлоқ хўжалиги вазири Иброҳим Абдураҳмонов Италиянинг Ўзбекистондаги фавқулодда мухтор элчиси Агостина Пинна билан учрашувида қайд этилган.
Учрашувда вазир Ўзбекистон ва Италия қишлоқ хўжалиги соҳасидаги алоқалари тўғрисида тўхталиб, икки мамлакат ўртасида қишлоқ хўжалиги соҳасида алоқалар тобора мустаҳкамланиб бораётгани таъкидлаган.
Элчи Агостина Пинна икки давлатнинг қишлоқ хўжалиги йўналишида амалга оширилиши кутилаётган лойиҳалар ҳақида тўхталиб, Ўзбекистон ва Италия қишлоқ хўжалиги вазирликлари ўртасида имзоланган Англашув меморандумини рўёбга чиқариш, Италия компаниялари билан ҳамкорликда умумий қиймати 382 млн долларлик 8 та лойиҳани амалга ошириш устувор масала эканлигини қайд этган.
Шунингдек, учрашувда элчи CIVI Italia уюшмаси Сурхондарёда халқаро кўчатчилик марказини ташкил этишга тайёр эканлигини ҳам эътироф этган. Агостина Пинна шунингдек, қишлоқ хўжалиги вазири 2024 йил 8-10 май кунлари Италиянинг Римини шаҳрида МАKFRUT халқаро кўргазмасида миллий стенд ташкил этган ҳолда маҳаллий маҳсулотлар намойишини ўтказиш таклифини билдирган.
Қолаверса, Италиянинг йирик Bonifiche Ferraresi компанияси Ўзбекистонда қишлоқ хўжалиги маҳсулотлари етиштиришга қизиқиш билдираётгани, ушбу компания инвестицияси иштирокида соҳада улкан лойиҳани амалга ошириш борасида ҳам фикрлар билдирилган. Бу таклиф Қишлоқ хўжалиги вазирлиги раҳбарияти томонидан қўллаб-қувватланган.
Изоҳ (0)