Odam papillomasi virusiga qarshi vaksina bilan 9-14 yoshli qizlar bepul emlanishlari mumkin. Bu haqda Sanitariya-epidemiologik osoyishtalik va jamoat salomatligi qo‘mitasi bosh mutaxassisi Xursanoy Jamalova “Daryo” muxbiriga bergan qisqacha intervyusida aytib o‘tdi.
Xursanoy Jamalovaning aytishicha, odam papillomasi virusiga qarshi vaksina bilan 9 yoshli qizlarni emlash O‘zbekistondan 15 yil avval Yevropa davlatlarida amaliyotga kiritilgan.
Bugungi kunga kelib tajriba shuni ko‘rsatmoqdaki, o‘sha vaqtda emlangan, hozir 25-30 yosh va undan yuqori ayol-qizlarda bachadon bo‘yin saratoni, kondiloma, ko‘krak bezi saratoni va turli o‘sma kasalliklarini keskin kamaygan.
O‘zbekistonda ham 2019-yildan boshlab 9 yoshdagi qizlarni emlash taqvimiga rejaga kiritildi. Bugungi kunda 9-14 yoshdagi 1 million 800 nafar qiz emlandi. Ular orasida bironta nojo‘ya holat ro‘yxatga olinmadi, — dedi mutaxassis.
Uning alohida ta’kidlashicha, katta yoshdagi ayol-qizlar bepul emlanmaydi.
Davlat tomonidan xarid qilib olib kelinayotgan vaksina faqat ma’lum yoshdagi qatlamgagina taalluqli. Agar kimdir 9 yoshda emlanmay qolib ketgan bo‘lsa, ularga 14 yoshgacha bo‘lgan oraliqda emlashga ruxsat berilgan. Qolgan shaxslar o‘rnatilgan tartibda pulli emlash markazlaridan ushbu vaksinatsiyani olishlari mumkin, — dedi Xursanoy Jamalova.
Ma’lumot uchun, hozirgi vaqtda odam papilloma virusiga qarshi 2 ta profilaktik vaksinalar qo‘llaniladi – “Gardasil” va “Servariks”. Bu vaksinalar bachadon bo‘yni saratoni va boshqa jinsiy organlar saratoni kasalliklarini keltirib chiqaruvchi ikkita virus turlaridan himoya qiladi;
Bundan tashqari, “Gardasil” virus keltirib chiqaradigan jinsiy organlar kondilomalarining ham oldini oladi.
Izoh (0)