Одам папилломаси вирусига қарши вакцина билан 9-14 ёшли қизлар бепул эмланишлари мумкин. Бу ҳақда Санитария-эпидемиологик осойишталик ва жамоат саломатлиги қўмитаси бош мутахассиси Хурсаной Жамалова “Дарё” мухбирига берган қисқача интервьюсида айтиб ўтди.
Хурсаной Жамалованинг айтишича, одам папилломаси вирусига қарши вакцина билан 9 ёшли қизларни эмлаш Ўзбекистондан 15 йил аввал Европа давлатларида амалиётга киритилган.
Бугунги кунга келиб тажриба шуни кўрсатмоқдаки, ўша вақтда эмланган, ҳозир 25-30 ёш ва ундан юқори аёл-қизларда бачадон бўйин саратони, кондилома, кўкрак бези саратони ва турли ўсма касалликларини кескин камайган.
Ўзбекистонда ҳам 2019 йилдан бошлаб 9 ёшдаги қизларни эмлаш тақвимига режага киритилди. Бугунги кунда 9-14 ёшдаги 1 миллион 800 нафар қиз эмланди. Улар орасида биронта ножўя ҳолат рўйхатга олинмади, — деди мутахассис.
Унинг алоҳида таъкидлашича, катта ёшдаги аёл-қизлар бепул эмланмайди.
Давлат томонидан харид қилиб олиб келинаётган вакцина фақат маълум ёшдаги қатламгагина тааллуқли. Агар кимдир 9 ёшда эмланмай қолиб кетган бўлса, уларга 14 ёшгача бўлган оралиқда эмлашга рухсат берилган. Қолган шахслар ўрнатилган тартибда пулли эмлаш марказларидан ушбу вакцинацияни олишлари мумкин, — деди Хурсаной Жамалова.
Маълумот учун, ҳозирги вақтда одам папиллома вирусига қарши 2 та профилактик вакциналар қўлланилади – “Гардасил” ва “Серварикс”. Бу вакциналар бачадон бўйни саратони ва бошқа жинсий органлар саратони касалликларини келтириб чиқарувчи иккита вирус турларидан ҳимоя қилади;
Бундан ташқари, “Гардасил” вирус келтириб чиқарадиган жинсий органлар кондиломаларининг ҳам олдини олади.
Изоҳ (0)