Депутат Жаҳонгир Жиянов “Соядаги сиёсатчилар” Telegram каналида Андижон шаҳар ободонлаштириш бошқармаси томонидан декоратив ўсимликлар қаламчалари “Черенки декоративних растений” кўчатларининг 1 донасини салкам 700 миллион сўмдан сотиб олингани ҳақида хабар берган эди.
Унда айтилишича,
- Декоратив ўсимликлар қаламчалари “Черенки декоративних растений” кўчатларининг 1 донаси 598 миллион 700 минг сўмдан “ЯТТ Тахиров Абдулвохид Василович”дан сотиб олинган.
- Декоратив ўсимликлар қаламчалари “Черенки декоративних растений” кўчатларининг 1 донаси 698 миллион 650 минг сўмдан “ЯТТ Насирдинова Мухайёхон Одилжон қизи”дан сотиб олинган.
- Декоратив ўсимликлар қаламчалари “Черенки декоративних растений” кўчатларининг 1 (бир) донаси 698 миллион 700 минг сўмдан “Гуллар ва ландшафт” МЧЖдан сотиб олинган.
“Депутат сўровимизга Андижон шаҳар ободонлаштириш бошқармаси томонидан 2023 йилда экилган манзарали ва игна баргли дарахтлар тўғрисида тақдим этилган маълумотда бор йўғи 99,855,000 сўмлик дарахтлар экилганини иддао қилган эди.
Афсуски, Андижон шаҳар ободонлаштириш бошқармаси томонидан 2023 йилда экилган манзарали ва игна баргли дарахтлар тўғрисида тақдим этилган маълумотларда юқоридаги декоратив ўсимликлар қаламчалари “Черенки декоративних растений” кўчатлари тўғрисида маълумот келтирилмаган.
Хуллас, битта ташкилот давлат бюджети маблағларидан 3 (уч) дона қаламчаларни 2 млрд сўмга сотиб олса-я. Қалам эмас, қаламча. Бу пулга ўрмонча сотиб олса бўлса керак”, — дейди депутат.
Мазкур ҳолат юзасидан Андижон шаҳар ҳокимлиги матбуот хизмати муносабат билдирди.
Унда айтилишича, шаҳар ободонлаштириш бошқармаси томонидан манзарали ва игна баргли дарахтлар ҳамда мавсумий гуллар сотиб олиш мақсадида давлат харидлари электрон тизими орқали (etender.uzex.uz) очиқ танлов эълон қилинган. Танловда ғолиб деб топилган “ЯТТ Тахиров Абдулвохид” ҳамда “Гуллар ландшафт” МЧЖлар билан шартнома тузилган.
“ЯТТ Тахиров Абдулвохид” ҳамда “Гуллар ландшафт” МЧЖ томонидан 1 миллиард 996 миллион 50 минг сўмлик 83 хил турдаги жами 5 минг 235 та манзарали ва игна баргли дарахтлар ҳамда мавсумий гуллар етказиб берилган.
Ободонлаштириш бошқармаси томонидан ушбу етказиб берилган манзарали ва игна баргли дарахтлар ҳамда мавсумий гуллар шаҳарнинг марказий кўчалари, майдонларга экилган.
Андижон шаҳар ҳокимлиги депутат Жаҳонгир Жиянов санаб ўтган “ЯТТ Насирдинова Мухайёхон Одилжон қизи”дан 698 миллион сўмлик харид ҳақида ва 2023 йил якунлари бўйича депутатлик сўровига жавоб тариқасида берилган маълумотда “Черенки декоративних растений” кўчатлари тўғрисида ҳеч нарса айтилмагани юзасидан тушунтириш бермаган.
Изоҳ (0)