Jurnalistika va ommaviy kommunikatsiyalar universiteti rektori Sherzodxon Qudratxo‘ja AlterEgo loyihasiga bergan intervyusida o‘zi yashayotgan mamlakat tilini bilmaydiganlar “bosqinchi yoki ahmoq” bo‘lishini aytganidan so‘ng “Rossotrudnichestvo” u bilan barcha aloqalarni to‘xtatdi. Bu voqeadan so‘ng ko‘plab faollar o‘z munosabatini bildirdi.
“Ey, sen o‘zing kimsan-ku, sening aloqani uzganing nima bo‘lar edi?! Ishonamanki, sening bu aljirashing Sherzodxon akaga chivin chaqqanchalik taʼsir qilmaydi. Istasang, o‘sha aloqani uzadiganlar ro‘yxatiga meni ham qo‘shib qo‘yishing mumkin, bundan faqat xursand bo‘laman”. — dedi huquqshunos Xushnudbek Xudoyberdiyev va rus propagandasi o‘z manfaatlariga qarshi kichik zarar ko‘radigan voqeaga ham juda tez va keskin reaksiya berishiga qoyil qolishini aytdi.
Sherzodxon Qudratxo‘janing gaplariga ham bir kun o‘tmasdanoq javob qaytarishdi, vaholanki, u yerda Rossiyaga qarshi biror gap yo‘q edi.
Xushnudbek Xudoyberdiyev hozirgi vaziyatda to‘liqligicha Sherzodxon Qudratxo‘jani qo‘llab-quvvatlashini bildirdi va O‘zbekiston fuqarosiga asossiz tahdid qilgani uchun Yevgeniy Primakovning o‘zini O‘zbekistonga kirishiga taqiq qo‘yilishini so‘radi.
Bloger Shahnoza Soatovaning yozishicha, UzTwitter foydalanuvchilari Sherzodxon Qudratxo‘jani “mening yangi kumirim” deb olqishlashmoqda.
Siyosatshunos Kamoliddin Rabbimov shu paytgacha rus imperiyachilari, millatchilari O‘zbekistonga ko‘p tosh otishganini aytib o‘tdi.
“Nega Rossiyalik siyosatchilar bunchalik o‘zidan ketyapti? Sababi shu paytgacha rus imperiyachilari, millatchilari O‘zbekistonga ko‘p tosh otishdi, davlat esa javob bermadi. Bularning ruhiyati shunaqa, qanchalik madaniyatli bo‘lsak, shunchalik boshga chiqishadi. Davlat jiddiy bayonot bermagunicha, bular shunaqa boshga chiqaverishadi”, — dedi u.
Bloger Muhrim A’zamxo‘jayev Sherzodxon Qudratxo‘jani hozirgi Rossiya persona non grata deb e’lon qilganini sharaf deb atadi.
“Sherzodxon akani hozirgi Rossiya persona non grata deb e’lon qilgani bilan tabriklayman (umuman olganda, bu sharaf). Ikkinchidan, hozirgi Rossiya Sherzodxon akani persona non grata deb e’lon qilgani uchun — o‘zimga ham qanchalik g‘alati tuyulmasin — hozirgi Rossiyaga rahmat aytaman va hozirgi Rossiyani persona non grata deb e’lon qilingan o‘zbekistonlik vallomatlar ro‘yxatini beto‘xtov kengaytirishga, iloji bo‘lsa, O‘zbekistonning butun vazir-u hokimlaridan tortib, umuman, barcha amaldorlarini shu ro‘yxatga kiritishga chaqiraman: Rossiyaning o‘zi yordam bermasa, bizning vallomatlarimiz: “Tarixan Rossiyaga bog‘liqmiz, boshqa yo‘limiz yo‘q, ular bilan munosabat qilmasak bo‘lmaydi”, deb xotirjam yuraveradi, yangi yo‘llar, yangi hamkorlarni qidirmaydi, yonida shuncha yaxshi qo‘shnisi bo‘la turib, gazni ham, neftni ham, menejerni ham, boshqasini ham Rossiyada izlayveradi”, — dedi u.
Bloger Hikmat Ubaydullayev Sherzodxon Qudratxo‘ja globalizatsiya va multikulturalizm shartlarida milliy identifikatsiya saqlashning muhim masalasini ko‘targani haqida gapirdi.
Qudratxo‘ja globalizatsiya va multikulturalizm shartlarida milliy identifikatsiya saqlashning muhim masalasini ko‘tardi. Uning fikrlarida o‘zaro hurmat va tushunish, yashayotgan mamlakatingning tilini o‘rganish va hurmat qilish zarurati, birlashishga emas, aksincha, madaniy xilma-xillikka asoslangan umumiy hurmat va tushunishga asoslangan birlashishga chaqiriq mavjud.
Shuningdek, Sherzodxon Qudratxo‘janing, ayniqsa, o‘zbekchada qiynaladigan rusiyzabonlarga “sal og‘irroq botgan” gapidagi tagma’noni qo‘llab-quvvatlashini bildirib, odam o‘zi umr bo‘yi yashab, 10-20 yillab ishlab turgan mamlakatidagi mutlaq ko‘pchilik ishlatadigan tilni bilishi, o‘rganishi kerakligini ta’kidladi.
Izoh (0)