Журналистика ва оммавий коммуникациялар университети ректори Шерзодхон Қудратхўжа AlterEgo лойиҳасига берган интервьюсида ўзи яшаётган мамлакат тилини билмайдиганлар “босқинчи ёки аҳмоқ” бўлишини айтганидан сўнг “Россотрудничество” у билан барча алоқаларни тўхтатди. Бу воқеадан сўнг кўплаб фаоллар ўз муносабатини билдирди.
“Эй, сен ўзинг кимсан-ку, сенинг алоқани узганинг нима бўлар эди?! Ишонаманки, сенинг бу алжирашинг Шерзодхон акага чивин чаққанчалик таъсир қилмайди. Истасанг, ўша алоқани узадиганлар рўйхатига мени ҳам қўшиб қўйишинг мумкин, бундан фақат хурсанд бўламан”. — деди ҳуқуқшунос Хушнудбек Худойбердиев ва рус пропагандаси ўз манфаатларига қарши кичик зарар кўрадиган воқеага ҳам жуда тез ва кескин реакция беришига қойил қолишини айтди.
Шерзодхон Қудратхўжанинг гапларига ҳам бир кун ўтмасданоқ жавоб қайтаришди, ваҳоланки, у ерда Россияга қарши бирор гап йўқ эди.
Хушнудбек Худойбердиев ҳозирги вазиятда тўлиқлигича Шерзодхон Қудратхўжани қўллаб-қувватлашини билдирди ва Ўзбекистон фуқаросига асоссиз таҳдид қилгани учун Евгений Примаковнинг ўзини Ўзбекистонга киришига тақиқ қўйилишини сўради.
Блогер Шаҳноза Соатованинг ёзишича, УзTwitter фойдаланувчилари Шерзодхон Қудратхўжани “менинг янги кумирим” деб олқишлашмоқда.
Сиёсатшунос Камолиддин Раббимов шу пайтгача рус империячилари, миллатчилари Ўзбекистонга кўп тош отишганини айтиб ўтди.
“Нега Россиялик сиёсатчилар бунчалик ўзидан кетяпти? Сабаби шу пайтгача рус империячилари, миллатчилари Ўзбекистонга кўп тош отишди, давлат эса жавоб бермади. Буларнинг руҳияти шунақа, қанчалик маданиятли бўлсак, шунчалик бошга чиқишади. Давлат жиддий баёнот бермагунича, булар шунақа бошга чиқаверишади”, — деди у.
Блогер Муҳрим Аъзамхўжаев Шерзодхон Қудратхўжани ҳозирги Россия персона нон грата деб эълон қилганини шараф деб атади.
“Шерзодхон акани ҳозирги Россия персона нон грата деб эълон қилгани билан табриклайман (умуман олганда, бу шараф). Иккинчидан, ҳозирги Россия Шерзодхон акани персона нон грата деб эълон қилгани учун — ўзимга ҳам қанчалик ғалати туюлмасин — ҳозирги Россияга раҳмат айтаман ва ҳозирги Россияни персона нон грата деб эълон қилинган ўзбекистонлик валломатлар рўйхатини бетўхтов кенгайтиришга, иложи бўлса, Ўзбекистоннинг бутун вазир-у ҳокимларидан тортиб, умуман, барча амалдорларини шу рўйхатга киритишга чақираман: Россиянинг ўзи ёрдам бермаса, бизнинг валломатларимиз: “Тарихан Россияга боғлиқмиз, бошқа йўлимиз йўқ, улар билан муносабат қилмасак бўлмайди”, деб хотиржам юраверади, янги йўллар, янги ҳамкорларни қидирмайди, ёнида шунча яхши қўшниси бўла туриб, газни ҳам, нефтни ҳам, менежерни ҳам, бошқасини ҳам Россияда излайверади”, — деди у.
Блогер Ҳикмат Убайдуллаев Шерзодхон Қудратхўжа глобализация ва мултикултурализм шартларида миллий идентификация сақлашнинг муҳим масаласини кўтаргани ҳақида гапирди.
Қудратхўжа глобализация ва мултикултурализм шартларида миллий идентификация сақлашнинг муҳим масаласини кўтарди. Унинг фикрларида ўзаро ҳурмат ва тушуниш, яшаётган мамлакатингнинг тилини ўрганиш ва ҳурмат қилиш зарурати, бирлашишга эмас, аксинча, маданий хилма-хилликка асосланган умумий ҳурмат ва тушунишга асосланган бирлашишга чақириқ мавжуд.
Шунингдек, Шерзодхон Қудратхўжанинг, айниқса, ўзбекчада қийналадиган русийзабонларга “сал оғирроқ ботган” гапидаги тагмаънони қўллаб-қувватлашини билдириб, одам ўзи умр бўйи яшаб, 10-20 йиллаб ишлаб турган мамлакатидаги мутлақ кўпчилик ишлатадиган тилни билиши, ўрганиши кераклигини таъкидлади.
Изоҳ (0)