Surxondaryo viloyati hokimi Ulug‘bek Qosimov muammolarni ko‘tarib chiqib, hokimlikka yaqindan yordam berayotgan jurnalist va blogerlarga minnatdorlik izhor qildi. Viloyat rahbari bu haqda hokimlik soatida gapirgan.
Hokimlik axborot xizmatining ma’lumot berishicha, hokimlik soati yig‘ilishida hafta davomida bajarilishi lozim bo‘lgan muhim vazifalarni belgilab olish hamda ijro intizomi, aholi murojaatlari bilan ishlash, xususan, ishonch telefoni va ijtimoiy tarmoqlar orqali jurnalist, blogerlar tomonidan ko‘tarib chiqilgan hududlardagi muammolarning hal etilishi tahlil etilgan.
Mazkur yig‘ilishda viloyat, shahar va tumanlarning sektor rahbarlari, tashkilot, boshqarmalar boshliqlari, hududiy studiyalardan aloqador mas’ullar hamda jurnalist, blogerlar va jamoatchilik faollari ishtirok etgan.
Joylarda muammolarni ko‘tarib chiqib, bizga yaqindan ko‘makchi bo‘layotgan jurnalist va blogerlarimizga rahmat. Bu masalaga har bir rahbar va mas’ullar jiddiy e’tibor qaratib, murojaatlar ijrosini sifatli ta’minlashi, aholini qiynab kelayotgan muammolarni hal etishi lozim, — dedi viloyat rahbari.
Ulug‘bek Qosimovning matbuot kotibi Murodbek Davlatovning “Daryo”ga qo‘shimcha qilishicha, viloyatda jurnalist va blogerlardan iborat jamoatchilik kengashi tashkil etilgan bo‘lib, ular hududda o‘zlari ko‘rgan yoki murojaat qilingan muammolar haqida mas’ullarni ogohlantirib, ma’lum qiladi. Shu tariqa muammolar belgilangan muddatda yechimini topadi.
Hokimlik soatida, shuningdek, hududlarga tashriflar davomida berilgan topshiriqlar ijrosi, “Yashil makon” umummilliy loyihasining kuzgi daraxt ekish mavsumiga tayyorgarlik ko‘rish masalalari ham muhokama qilingan.
Viloyat rahbari sug‘orish tizimi bo‘lmagan va sifatsiz 100 ta daraxt ekkandan, agrotexnik talablar asosida bitta daraxt ekib, uni parvarishlash, ertaga ekologiyani musaffoligini saqlashda va chang-to‘zonlarning oldini olishda muhim o‘rin tutishini ta’kidladi, — deydi hokimlik axborot xizmati rahbari.
Izoh (0)