Farg‘onada gaz zapravkada janjal ko‘targan shaxslarga chora ko‘rildi

Farg‘ona viloyatidagi gaz quyish shoxobchasida janjal ko‘targan shaxslar javobgarlikka tortildi, deb xabar beradi viloyat IIB axborot xizmati.

Qayd etilishicha, 2-fevral kuni O‘zbekiston tumani “Dahanaqaqir” MFY hududida joylashgan avtomashinalarga suyultirilgan gaz quyish shoxobchasida fuqaro O.J. o‘zaro kelishmovchilik sababli fuqaro B.U. bilan tortishib qolgan va holatga O.J.ning yaqin qarindoshi O.T. ham aralashib, o‘rtada o‘zaro janjal kelib chiqqan.

Mazkur holat shu yerda jamoat tartibini saqlayotgan tuman IIB xodimlari tomonidan bartaraf etilib, tegishli hujjatlar rasmiylashtirilgan.

9-fevral kungi sud-tibbiy ekspertiza xulosasida ushbu fuqarolarning har birida yengil shikastlar toifasiga kiruvchi jarohatlar aniqlangani sababli, yuqoridagi shaxslarga nisbatan Ma’muriy javobgarlik to‘g‘risidagi kodeksning 52-moddasiga (yengil tan jarohati yetkazish) asosan bayonnomalar rasmiylashtirilib, qonuniy qaror qabul ko‘rishlik uchun jinoyat ishlari bo‘yicha O‘zbekiston tuman sudiga yuborilgan.

Avvalroq Farg‘onadagi gaz zapravkada sodir bo‘lgan janjal oqibatida 23 yoshli yigit halok bo‘lgani to‘g‘risida xabar berilgandi.