Ижтимоий тармоқларда Ўзбекистон давлат санъат ва маданият институтининг 4-босқич талабалари деканат уларни институт ётоқхонасидан ҳайдаётгани ҳақида мурожаат билан чиқишди.
Мурожаатда улар ётоқхона билан бир йилга шартнома тузишгани, тўловларни ўз вақтида тўлашганини таъкидлаган.
“Бизнинг шароитимизни тушунишмаяпти. Бизни қизиқтирмайди деб, кўчага ҳайдашяпти. Биз нима қилайлик? Ётоқхонага ишониб, шароитимизни тўғрилаганмиз. Кечадан бери тинчлик йўқ. Ётоқхонада турли вилоятлардан келган талабалар яшайди.
Қиз бола бошимиз билан эртага қаёққа борамиз? Ҳамма нарса ҳал бўлган, амалиёт жойимиз шу ерда, — дейилади мурожаатда.
Хўш, аслида, вазият қандай? Масалани ўрганиш учун Тошкент шаҳар ҳокими ўринбосари Нодира Умарова талабалар ётоқхонасига ташриф буюрди. Ўрганиш ва суриштирув ишлари олиб борилди.
Талабалар норозилигига сабаб бўлаётган омиллар нима? Улар ҳақми ёки масалани бир томонлама очиқлашяптими? Бу саволга Ўзбекистон давлат санъат ва маданият институти ректори вазифасини бажарувчи Элдор Шерманов қуйидагича жавоб берди.
— Институтимизда иккита талабалар турар жойи мавжуд. Уларнинг умумий сиғими 770 та бўлиб, ярмидан кўпроғини қизлар ташкил этади. Бу йил ҳисоби бўйича 97 нафар юқори курс талабалари истиқомат қилишяпти. Ўқув дастурида белгиланганидек, битирувчи талабалар 5 февралдан 11 майга қадар амалиёт ўташлари керак. Талабаларнинг 46 нафари доимий яшаш ҳудудлари бўлган муассасаларда амалиёт ўташлари белгиланган. Биз ўқув йили бошида жой етмагани учун талабалар ётоқхонасига жойлашолмаган ва қиммат нархда ижара уйда қийналиб яшаётган биринчи курс талабаларини ётоқхонага жойлаштиришни режалаштиргандик. Аммо вилоятларда амалиёт ўташи керак бўлган талабаларнинг аксарияти Тошкентдан кетишни истамай, ётоқхонадаги ўрнини ҳам бўшатмаган.
Амалиёт ўтказилишидан мақсад талаба уч ой давомида тажриба орттириши белгиланган. Агар талаба амалиётга боришни истамай, Тошкентда бошқа ишлар билан шуғулланиб юрса, оқибати қандай бўлади?
Бундан ташқари, ўша талабаларнинг кўпчилиги ётоқхона учун тўловларни ҳам амалга оширмаган. Белгиланган қарор бўйича ётоқхонага жойлашиш 200 минг сўм этиб белгиланган. Афсуски, уларнинг 80 фоизи декабрь, январь ойи учун ҳам тўловларни амалга оширмаган. Қўшимчасига, белгиланган тартибда амалиётни ҳам ўташни исташмаяпти. Раҳбарият томонидан тушунтириш ишлари олиб борилганида “Бизни талабалар ётоқхонасидан мажбуран чиқаришяпти”, деган постлар жойлашган, — дейди Элдор Шерманов.
Жамоатчилик вакиллари орасида талабалар моддий жиҳатдан қийналаётгани учун тўловларни амалга оширолмаётгандир, деган эътирозлар ҳам бўлди. Бу саволга Элдор Шерманов қуйидагича жавоб берди.
— Агар Тошкент шаҳридаги ижара нархи билан солиштирадиган бўлсак, талабалар ётоқхонасида яшаш анча арзон. Қонунда талабалар ётоқхонасининг бир ойлик тўлови 200 минг сўм этиб белгиланган. Ота-оналар билан суҳбатлашсак, пулни олдиндан бериб юборишганини айтишади. Аммо фарзандлари уни бошқа харажатларига ишлатиб, ётоқхонага пул тўлашмайди.
Агар талабанинг амалиёти Тошкентда бўлса, унинг ётоқхонада қолишига ҳеч ким қарши эмас. Аммо амалиётга бормай, тажриба орттирмай, уч ойдан ошиқроқ беҳуда вақтини ўтказиши яхши эмас, — дейди Ўзбекистон давлат санъат ва маданият институти ректори вазифасини бажарувчи Элдор Шерманов.
Изоҳ (0)