Ko‘ksaroyda Belarus prezidentini rasmiy kutib olish marosimi bo‘lib o‘tdi (foto)

Shavkat Mirziyoyev taklifiga binoan Belarus prezidenti Aleksandr Lukashenko 7-fevral kuni rasmiy tashrif bilan O‘zbekistonga kelgandi. 8-fevral kuni ushbu davlat rahbarini rasmiy kutib olish marosimi bo‘lib o‘tdi.

Prezident matbuot xizmatining xabar qilishicha, Ko‘ksaroy qarorgohida O‘zbekiston va Belarus bayroqlari bilan bezatilgan maydonda oliy martabali mehmon sharafiga faxriy qorovul saf tortdi. Shavkat Mirziyoyev Belarus yetakchisini samimiy kutib oldi va shohsupaga taklif qildi. Ikki mamlakat madhiyalari yangradi.

Davlat rahbarlari faxriy qorovul safi oldidan o‘tib, rasmiy delegatsiyalar a’zolarini qutladi. Birgalikda suratga tushilgach, oliy darajadagi muzokaralar boshlandi.

Tashrif dasturiga muvofiq oliy darajadagi muzokaralar o‘tkazilishi, ularda O‘zbekiston va Belarus o‘rtasidagi ko‘p qirrali hamkorlikni yanada kengaytirishning amaliy jihatlari ko‘rib chiqilishi rejalashtirilgan.

O‘zaro tovar ayirboshlashni oshirish, qishloq xo‘jaligi, yengil va oziq-ovqat sanoati, farmatsevtika, kommunikatsiyalar va boshqa tarmoqlarda kooperatsiya aloqalarini rivojlantirish masalalari diqqat markazida bo‘ladi. Professional ta’lim, sog‘liqni saqlash, madaniyat, sport va turizm sohalarida sheriklikni rivojlantirish dasturlari ham muhokama qilinadi.

Muzokaralar yakunida ikki tomonlama hujjatlar to‘plamini qabul qilish ko‘zda tutilgan.