Toshkent shahrida va Namangan viloyatida noqonuniy valyuta ayirboshlash bilan shug‘ullanib kelgan shaxslar ushlandi, deb xabar beradi Bosh prokuratura huzuridagi departament.
Ma’lum qilinishicha, departamentning Mirobod tuman bo‘limi tomonidan Toshkent shahar IIBB xodimlari bilan hamkorlikda tezkor tadbir o‘tkazilgan. Tadbirda valyuta ayirboshlash bilan shug‘ullanib kelgan X.M. va B.A. jami 6 ming dollarni 74,6 million so‘mga sotgan vaqtida ushlanib, X.M.ning boshqaruvidagi Nexia-3 rusumli avtotransport vositasidan 31 ming 315 dollar va 3,3 million so‘m ashyoviy dalil sifatida olingan.
Shu kabi, departamentning Namangan shahar bo‘limi tomonidan o‘tkazilgan tezkor tadbirda valyuta ayirboshlash bilan shug‘ullanib kelgan R.B. jami 3,5 ming dollarni fuqaro A.A.dan 43,5 million so‘mga sotib olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Andijon va Qashqadaryo viloyatlarida valyuta qimmatliklarini noqonuniy muomalaga kiritilishiga chek qo‘yilgani to‘g‘risida xabar berilgandi.
Izoh (0)