Toshkent viloyati ekologiya boshqarmasi ijtimoiy tarmoqlarda Yangi Angren IES bilan bog‘liq murojaat bo‘yicha o‘rganish ishlarini olib bordi.
Ma’lum qilinishicha, Yangi Angren IESda mutaxassislar tomonidan o‘tkazilgan tekshirish davomida atmosfera havosiga tashlanayotgan zararli moddalar belgilangan meʼyorlarga nisbatan yuqori ekani aniqlangan. Shu bilan birga, chang gaz tozalash uskunalari (filtrlari) samaradorligi 80 foizga tushib ketgani maʼlum bo‘lgan.
Mazkur holat bo‘yicha atmosfera havosini zararli moddalar bilan ifloslantirgani uchun 887 million, sanoat chiqindilarini belgilanmagan joyga joylashtirgani uchun 116 million, jami 1 milliard 3 million so‘m kompensatsiya to‘lovlari hisoblangan.
Bundan tashqari 11 nafar mansabdor shaxsga nisbatan tegishli choralar ko‘rish yuzasidan huquqni muhofaza qilish organlariga murojaat qilingan. Shuningdek, atmosfera havosini ifloslanishini oldini olish bo‘yicha chang gaz tozalash uskunalarini ishlash samaradorligini oshirish bo‘yicha kechiktirib bo‘lmas chora-tadbirlar rejasi ishlab chiqilgan.
Avvalroq Toshkent viloyati hokimligi ijtimoiy tarmoqlarda ko‘mir sifatining havo ifloslanishiga salbiy taʼsiri ko‘rsatilgan videolavhalarga munosabat bildirgandi. Unda Angren issiqlik elektr stansiyasida 2016-yilda ishga tushirilgan yangi energoblok mahalliy ko‘mir hisobiga ishlashi, ammo zamonaviy elektrofiltrlar hisobiga atmosferaga deyarli zararli gazlar chiqarmasligi aytilgan edi.
Izoh (0)