Ўзбекистон банкларидаги умумий пул тушумларининг ҳажми (нақд пул ва терминаллар орқали) 2023 йилда 669 триллион сўмни ташкил этди, кўрсаткич 2022 йилга нисбатан 28 фоизга кўп. Бу ҳақда Марказий банк шарҳида сўз боради.
Регулятор маълумотларига кўра, банкларга нақд пул тушумлари йил давомида 20 фоизга ошиб, 414 триллион сўмни ташкил этган. Шунга қарамай, нақд пул улуши 66 фоиздан 62 фоизга тушган (2021 йилда 69 фоизни ташкил этганди).
Терминаллар орқали тушумлар 44 фоиз — 255 триллион сўмга, уларнинг улуши — 34 фоиздан 38 фоизга (2021 йилда — 31 фоиз) ўсган.
2023 йилда банк карталарига 789 триллион сўм кирим қилинган. Бу кўрсаткич 2022 йилга нисбатан 1,4 баробарга ошган. Ўтган йили банк карталаридаги 189 триллион сўм маблағлар нақдлаштириб олинган.
2022 йилда банк карталарга келиб тушган маблағларнинг 27 фоизи нақдлаштириб олинган бўлса, бу кўрсаткич 2023 йилда 24 фоизни ташкил этган.
Эслатиб ўтамиз, 2023 йилнинг олти ойида банк кассаларидан (шу жумладан, банкоматлардан) берилган нақд пуллар 2022 йил мос даврига нисбатан 14,2 фоизга кўпайган ва 187,3 триллион сўмни ташкил этганди.
Изоҳ (0)