2024-yilda Gruziyada AQSH bilan Troojan Footprint qo‘shma harbiy mashg‘ulotlar va Noble Partner ko‘p millatli treninglari o‘tkaziladi. Bu haqda bosh vazirlikka nomzod Irakliy Kobaxidze dasturida aytilgan.
“2024-yilda Gruziya AQSH Yevropa qo‘mondonligining maxsus shtab-kvartirasini qabul qiladi. Ko‘p millatli operativ kuchlarning Troojan Footprint mashqlari hamda Noble Partner Amerika—Gruziya ko‘p millatli mashqlari. Bundan tashqari, Gruziya harbiylari AQSH tomonidan xorijda tashkil etiladigan mashg‘ulotlarda qatnashadi”, — deyiladi hujjatda.
Dasturda qayd etilishicha, 2024-yilda AQSH moliyaviy ko‘magi doirasida Gruziya Mudofaa vazirligiga ajratiladigan mablag‘ 50 million dollardan ortiqni tashkil etadi. Ikki tomonlama hamkorlikda asosiy e’tibor Gruziya mudofaa kuchlari texnikasini modernizatsiya qilishga qaratilgan.
2023-yil sentyabr oyida Gruziyada NATO davlatlari va hamkorlari harbiy xizmatchilari ishtirokida Agile Spirit ko‘p millatli mashqlari yakunlangan edi. Ularda 21 davlatdan 3 mingdan ortiq harbiy xizmatchilar qatnashdi. Mashg‘ulotlardan maqsad harbiy amaliyotlarni rejalashtirish va amalga oshirishda NATO mamlakatlari va hamkorlari qurolli kuchlarining o‘zaro hamkorligini oshirishdan iborat bo‘lgan.
Izoh (0)