Тошкент вилояти божхона бошқармаси ижтимоий тармоқларда “Ғишткўприк” чегара божхона пости орқали ўтаётган йўловчиларнинг юклари, хусусан, эски ишлатилган товарлар божхона ходимлари томонидан киритилмаётгани айтилган хабарларга муносабат билдирди.
Қайд этилишича, айрим фуқаролар томонидан ижтимоий тармоқларда тарқатилаётган бу каби хабарлар ҳеч қандай асосга эга эмас.
“Жисмоний шахслар томонидан божхона чегараси орқали товарларни олиб ўтишни янада тартибга солиш чора-тадбирлари тўғрисида” президент қарорига мувофиқ: Ўзбекистон давлат чегараларининг автойўл (пиёда) божхона чегаралари ўтиш пунктлари орқали олиб ўтишда — 300 доллар эквиваленти миқдоридаги товарларни божсиз олиб киришингиз мумкин.
Таъкидланишича, жисмоний шахслар томонидан божхона чегараси орқали олиб ўтилаётган товарларнинг қандай мақсадга мўлжалланганини аниқлашда товарларнинг миқдори ҳисобга олинади ва бунда товарларни олиб ўтаётган жисмоний шахс ва унинг оила аъзолари эҳтиёжларидан ортиқ миқдордаги бир турдаги товарларга, агар товарларни олиб ўтаётган шахс аксини исботлаб бермаса, тадбиркорлик фаолиятида фойдаланиш учун олиб кирилаётган товарлар деб қаралади.
Шу билан бирга, “Жисмоний шахслар томонидан Ўзбекистон Республикасига товарларни олиб ўтиш тартибини такомиллаштиришга доир қўшимча чора-тадбирлар тўғрисида” Вазирлар Маҳкамасининг қарори билан жисмоний шахслар томонидан давлат чегарасининг автойўл (йўловчи), темир йўл ва дарё ўтказиш пунктлари орқали божхона тўловлари ундирилмайдиган айрим товарларни (маиший техника) олиб ўтишнинг миқдор нормалари белгиланган бўлиб, бунда ҳар бир номдаги товардан 2 килограмм (бўлинмайдиган товарлар бундан мустасно: масалан музлатгич, кир ювиш машинаси ва шунга ўхшаш товарлар), аммо умумий оғирлик 10 килограммдан ошмаслиги керак 1 календарь ойда.
Юқорида қайд этилган ҳар қандай товарни белгиланган норма ва/ёки даврийликдан ортиқ олиб ўтилганда белгиланган тартибда божхона тўловлари ундирилади.
“Жисмоний шахслар томонидан шахсий эҳтиёжлари учун товарларни олиб ўтиш тартибини янада такомиллаштириш тўғрисида”ги президент қарорига мувофиқ ягона божхона тўлови божхона тўловлари ундирилмайдиган товарларни жисмоний шахслар томонидан республикага олиб киришнинг чекланган меъёрларидан ортган тақдирда, Ташқи иқтисодий фаолият товар номенклатураси кодидан ва келиб чиқиш мамлакатидан қатъий назар товарларнинг барча тоифалари бўйича божхона қийматидан келиб чиққан ҳолда, чекланган меъёрлардан ортиқ қисмига нисбатан ундирилади.
Ягона божхона тўлови ставкаси товарнинг божхона қийматидан 30 фоиз, лекин ҳар бир килограми учун 3 доллардан кам бўлмаган миқдорни ташкил этади.
Жисмоний шахслар амалдаги тартибларга мувофиқ олиб Ўзбекистон божхона чегарасини кесиб ўтишда ўзлари билан олиб кетаётган товар ва моддий бойликларнинг президент ва Вазирлар Маҳкамаси қарорлари билан белгиланган меъёрлар асосида ишончли ва тўғри декларацияланиши учун қонун ҳужжатларга мувофиқ жавобгар бўлади.
“Тошкент вилояти божхона бошқармаси божхона органлари фаолиятига доир холис ва ҳаққоний хабарларни эълон қилишда оммавий ахборот воситалари, кенг жамоатчилик вакиллари билан ўзаро ҳамкорликка доимо тайёрлигини маълум қилади”, — дейилади хабарда.
Изоҳ (0)