Birlashgan Millatlar Tashkiloti “Tolibon” harakatini “Al-Qoida” terrorchilaridan ajralishga undash uchun barcha imkoniyatlarni ishga solmoqda. Bu haqda BMT bosh kotibi o‘rinbosari, tashkilotning terrorizmga qarshi kurash boshqarmasi rahbari Vladimir Voronkov ma’lum qildi.
“Al-Qoida” yetakchisi Ayman al-Zavohiriyning Afg‘onistonda yo‘q qilinishi haqidagi savolga javob berar ekan, Voronkov BMTning sa’y-harakatlariga qaramay, “Al-Qoida” Afg‘onistonda hamon yetarlicha namoyon bo‘layotganini aytdi.
Boshqarmamiz ”Tolibon”ni terrorchilardan uzoqlashishga undash uchun qo‘lidan kelgan barcha ishni qilmoqda, — dedi u.AQSH prezidenti Jo Bayden 2-avgust kuni Kobulda “Al-Qoida” yetakchisi al-Zavohiriy o‘ldirilganini e’lon qilgandi. U hodisani “har tomonlama muvaffaqiyat” deb atadi va Afg‘oniston terrorchilar uchun “xavfsiz boshpana”ga aylanmasligi uchun Qo‘shma Shtatlar hamma narsani qilishini ta’kidladi.
Politico, Reuters va AP xabarlariga ko‘ra, zarba 31-iyul, yakshanba kuni dron orqali amalga oshirilgan. Agentliklarning ta’kidlashicha, Qo‘shma Shtatlar terrorchi guruh rahbari yo‘q qilingani haqida uning o‘limi tasdiqlanganidan keyin e’lon qilgan. “Tolibon” hukumati matbuot kotibi Zabihulloh Mujohid Kobulga qilingan hujumni keskin qoralab, buni “xalqaro tamoyillar”ning buzilishi deb atadi.
Mavzuga doir: AQSH tomonidan o‘ldirilgan “Al-Qoida” yetakchisi Ayman az-Zavohiriy kim edi? — tarixga nazar
Izoh (0)