Medvedev Kuril orollariga yangi qurollar joylashtirish rejalarini ma’lum qildi

Kuril orollari — Rossiya hududi, Moskva ularni rivojlantiradi, dedi Xavfsizlik kengashi raisi o‘rinbosari va sobiq prezident Dmitriy Medvedev.

“Shu bilan birga, orollarning strategik roli oshadi, jumladan, u yerda yangi qurollar joylashtiriladi”, — deb yozdi u “VKontakte” ijtimoiy tarmog‘ida.

Medvedev Yaponiya bosh vaziri Fumio Kisidaning Tokio hududiy mojaro hal bo‘lganidan keyin ham Moskva bilan tinchlik shartnomasi imzolanishini kutayotgani haqidagi so‘zlariga shu tariqa javob berdi.

Medvedevning so‘zlariga ko‘ra, agar “hududiy masala Rossiya konstitutsiyasiga muvofiq abadiy yopilgani” hisobga olinsa, bitim tuzishga “hech kim qarshi emas”. Xavfsizlik kengashi raisining o‘rinbosari Kuril orollarini bahsli hududlar deb hisoblamasligini va Yaponiya tomonining “Shimoliy hududlar” to‘g‘risidagi fikriga “unchalik ham ahamiyat bermasligini” aytdi. Tokio Janubiy Kuril orollarini shimoliy hududlar deb ataydi.

Sovet Ittifoqi nazorati ostida bo‘lgan Kunashir, Shikotan, Iturup va Xabomai tizmasi orollari tufayli bu ikki davlat Ikkinchi jahon urushidan keyin tinchlik shartnomasini tuzmagan edi. Tokio orollarni bosib olingan deb ataydi va ularni qaytarishni talab qiladi; Moskva bu hududlar qonuniy ravishda SSSR tarkibiga kirgan deb hisoblaydi.