“Umrimning boricha san yorimni derman”. 90 yoshida qo‘shiq aytayotgan namanganlik onaxon (video)

Namanganlik 90 yoshli Rahbarxon Yunusova o‘zining shirali va kuchli ovozi bilan barchani hayratga solmoqda. Bu haqda “Daryo” muxbiri Azizbek Abduvaliyev hikoya qilmoqda.

Rahbarxon aya Uchqo‘rg‘on tumanida istiqomat qiladi. 3 o‘g‘il, 7 qiz, jami 10 nafar farzandni dunyoga keltirgan, “Qahramon ona” unvonini olgan. Hozir ularning eng kattasi salkam 70 yoshni qoraladi.

Aya 50 yil davomida rahmatli turmush o‘rtog‘i Qo‘chqorvoy Yunusov bilan tumandagi jamoa xo‘jaligida ishlagan. Mavsumda 15 tonna paxta terib, Tojixon Asqarova nomidagi mukofotni ham qo‘lga kiritgan. Chopiq va yig‘im-terim paytlaridagi eng sevimli mashg‘uloti esa qo‘shiq xirgoyi qilish bo‘lgan.

“Oyimga ashula aytishga ishtiyoq buvim Qumrixon ayadan o‘tgan, u kishining ham yaxshigina ovozlari bo‘lgan. Faxriddin Umarov, Kamoliddin Rahimov, Xayrulla Lutfullayev, Habiba Oxunova, Tursunoy Mamedova, Munojot Yo‘lchiyevaning qo‘shiqlarini yaxshi ko‘rib eshitadilar. U kishining yo‘llaridan o‘g‘il-qizlar ichida men ketdim — Madaniy-oqartuv texnikumini tugatdim, hozirda madaniyat markazi direktori bo‘lib ishlayapman. Ona-bola bir bo‘lsak, basma-basiga qo‘shiq aytamiz, ammo ovozdagi shira va tembr borasida meni ortda qoldiradilar”, — deydi onaxonning o‘g‘li Tursunpo‘lat Yunusov.

Maʼlumot uchun, Rahbarxon aya Yunusovaning hozirda 100 dan ortiq nevara-evarasi va 12 nafar chevarasi bor.