Andijon viloyatining Shahrixon tumanidagi Asaka avtoturargohida tashkil etilgan buyum bozorida yong‘in sodir bo‘lgandi. Yong‘in bo‘lgan kompleks maydoni uy-joy qurishga ajratilishi haqida mish-mishlar paydo bo‘lgach, tuman hokimi aholiga murojaat qilib, buni rad etdi.
Tuman hokimi Hikmatillo Dadaxonovning bildirishicha, yong‘in oqibatlarini tezkorlik bilan bartaraf etish yuzasidan viloyat hokimi rahbarligida tezkor shtab tashkil qilindi. Shtabga 10 ta tumandan 100 kishidan, jami ming kishi tozalash ishlariga jalb etildi.
Shuningdek, viloyatdagi loyihalash, arxitektura va qurilish bo‘limlari jalb qilinib, tozalash ishlari bilan birga loyihalash ishlari ham amalga oshirilmoqda.
“Men tuman hokimi sifatida shuni bildirib o‘tmoqchimanki, 2020-yilda tuman bosh rejasini yangilaganmiz. Bosh rejada bu yerda ko‘p qavatli uylar qurish ko‘zda tutilmagan. Faqat savdo kompleksi qurilishi rejalashtirilgan”, — deydi hokim.
Uning bildirishicha tezkor shtabning maqsadi ham loyihalovchilarga zudlik bilan tozalangan yerni ochib berishdir.
Bu yerda savdo qilgan tadbirkorlar vaqtincha boshqa joyda savdo qilish uchun joy bilan ta’minlanadi. Qisqa fursatda zamonaviy, talablarga javob beradigan savdo kompkeksi qurib bitkazilgach, tadbirkorlar shu joyga qaytarib olib kelinadi.
Izoh (0)