Андижон вилоятининг Шаҳрихон туманидаги Асака автотураргоҳида ташкил этилган буюм бозорида ёнғин содир бўлганди. Ёнғин бўлган комплекс майдони уй-жой қуришга ажратилиши ҳақида миш-мишлар пайдо бўлгач, туман ҳокими аҳолига мурожаат қилиб, буни рад этди.
Туман ҳокими Ҳикматилло Дадахоновнинг билдиришича, ёнғин оқибатларини тезкорлик билан бартараф этиш юзасидан вилоят ҳокими раҳбарлигида тезкор штаб ташкил қилинди. Штабга 10 та тумандан 100 кишидан, жами минг киши тозалаш ишларига жалб этилди.
Шунингдек, вилоятдаги лойиҳалаш, архитектура ва қурилиш бўлимлари жалб қилиниб, тозалаш ишлари билан бирга лойиҳалаш ишлари ҳам амалга оширилмоқда.
“Мен туман ҳокими сифатида шуни билдириб ўтмоқчиманки, 2020 йилда туман бош режасини янгилаганмиз. Бош режада бу ерда кўп қаватли уйлар қуриш кўзда тутилмаган. Фақат савдо комплекси қурилиши режалаштирилган”, — дейди ҳоким.
Унинг билдиришича тезкор штабнинг мақсади ҳам лойиҳаловчиларга зудлик билан тозаланган ерни очиб беришдир.
Бу ерда савдо қилган тадбиркорлар вақтинча бошқа жойда савдо қилиш учун жой билан таъминланади. Қисқа фурсатда замонавий, талабларга жавоб берадиган савдо компкекси қуриб битказилгач, тадбиркорлар шу жойга қайтариб олиб келинади.
Изоҳ (0)