Qatar kompaniyasi O‘zbekistonda taʼlim va ko‘ngilochar bog‘ barpo etish loyihasida ishtirok etishi mumkin, deb xabar bermoqda “Dunyo” AA.
Ma’lum qilinishicha, elchixona ko‘magida O‘zbekistonning SilkRoadInvest Group masʼuliyati cheklangan jamiyati va Qatarning Power International Holding (PIH) kompaniyasi rahbariyati o‘rtasida muzokaralar tashkil etildi.
Muzokaralar davomida Toshkent viloyatida 180 gektar maydonda umumiy qiymati 300 million AQSH dollariga teng bo‘lgan Silk Road Land Edutainment Park bog‘ini barpo etish loyihasini amalga oshirish masalalari muhokama qilindi.
O‘zbekiston vakillari Qatar tomoniga mazkur loyihaning biznes rejasini taqdimot qildi. Qizg‘in muhokamalardan so‘ng tomonlar o‘rtasida hamkorlik memorandumi imzolandi.
Uchrashuv yakunida mazkur loyiha joylashgan manzilni ko‘zdan kechirish va uni amalga oshirish shartlarini batafsil muhokama qilish maqsadida 2024-yil fevral oyida Power International Holding kompaniyasi vakillarining O‘zbekistonga biznes-missiyasini tashkil etish to‘g‘risida kelishib olindi.
Ma’lumot uchun, 1983-yilda tashkil etilgan Power International Holding Qatarning xususiy sektordagi eng yirik kompaniyasi hisoblanadi. Kompaniya bugungi kunda dunyoning 19 ta mamlakatida faoliyat olib bormoqda. Forbes nashriga ko‘ra, PIH Yaqin Sharqdagi o‘n uchinchi eng yirik kompaniya hisoblanadi. Korxona ishchilari soni 65 mingdan ortiq. Shu kunga qadar amalga oshirgan loyihalari soni 1100 tani tashkil qiladi. Kompaniyaning Qatardagi oziq-ovqat sanoatidagi ulushi 70 foiz.
Izoh (0)