Shavkat Mirziyoyev 26-yanvar kuni Qirg‘iziston prezidenti Sadir Japarov bilan telefon orqali muloqot qildi. Bu haqda Prezident matbuot xizmati xabar berdi.
O‘zbekiston bilan Qirg‘iziston o‘rtasidagi ko‘p qirrali hamkorlikni yanada rivojlantirish va kengaytirishning dolzarb masalalari ko‘rib chiqildi. Davlat rahbarlari ikki tomonlama yaxshi qo‘shnichilik va keng qamrovli strategik sheriklik munosabatlari bugungi kunda yuksak darajaga ko‘tarilganini alohida mamnuniyat bilan qayd etdi.
Mamlakatlar hukumatlari, idoralari, hududlari va ishbilarmon doiralari o‘rtasida yaqin aloqalar va almashinuvlarni davom ettirish muhimligi ta’kidlandi. O‘zaro tovar ayirboshlash hajmini oshirish, avtomobilsozlik, elektrotexnika va to‘qimachilik tarmoqlarida, qishloq xo‘jaligi va boshqa ustuvor yo‘nalishlarda, shu jumladan, qo‘shma Taraqqiyot fondi doirasida sanoat kooperatsiyasi loyihalarini ilgari surish bo‘yicha birgalikda amalga oshirilayotgan chora-tadbirlar qo‘llab-quvvatlandi.
Madaniy-gumanitar hamkorlik dasturini kengaytirishga alohida e’tibor qaratildi. O‘zbekiston va Qirg‘iziston yetakchilari Markaziy Osiyo mintaqasidagi infratuzilmaviy loyihalarni amalga oshirish masalalarini muhokama qildi, bo‘lajak uchrashuvlar rejasini ko‘rib chiqdi.
Izoh (0)