Navoiy va Surxondaryo viloyatlarida kredit mablag‘larini o‘zlashtirish holatlari fosh etildi, deb xabar beradi Bosh prokuratura huzuridagi departament.
Qayd etilishicha, departamentning Qiziltepa tuman bo‘limi tomonidan AT “Xalq banki” Qiziltepa filialining murojaatiga asosan tergovga qadar tekshiruv o‘tkazilgan. Tekshiruvda “V.Z.” MCHJ masʼul shaxslari “N.I.” fermer xo‘jaligiga ijara huquqi asosida ajratilgan yer maydonini hamda issiqxona inshootini MCHJga ajratilgan kreditning garov taʼminoti sifatida qabul qilinishiga erishib, jami 3,2 milliard so‘m kredit mablag‘ini naqdlashtirib olib o‘zlashtirgani aniqlangan.
Shu kabi, departamentning Boysun tuman bo‘limi tomonidan o‘tkazilgan tergovga qadar tekshiruvda “B.Y.” MCHJ rahbari F.B. 7 nafar fuqaroga hududiy tijorat banki filialidan ajratilgan 202 million so‘m imtiyozli kredit mablag‘larini naqdlashtirib olgani, shuningdek 122,8 million so‘m soliqni to‘lashdan bo‘yin tovlab kelgani aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Buxoroda fermer xo‘jaligi soxta hujjatlar orqali 420 ming dollardan ortiq kredit mablag‘ini o‘zlashtirib yuborgani aniqlangani to‘g‘risida xabar berilgandi. Shuningdek, Surxondaryo viloyatining Oltinsoy va Termiz tumanlarida 11 milliard so‘mdan ortiq kredit mablag‘larini o‘zlashtirgan MCHJ rahbarlari aniqlangandi. Shuningdek, Surxondaryo va Farg‘onada oilaviy korxona rahbarlari 1,2 milliard so‘mdan ortiq imtiyozli kreditlarni talon-toroj qilgandi.
Izoh (0)