Навоий ва Сурхондарё вилоятларида кредит маблағларини ўзлаштириш ҳолатлари фош этилди, деб хабар беради Бош прокуратура ҳузуридаги департамент.
Қайд этилишича, департаментнинг Қизилтепа туман бўлими томонидан АТ “Халқ банки” Қизилтепа филиалининг мурожаатига асосан терговга қадар текширув ўтказилган. Текширувда “В.З.” МЧЖ масъул шахслари “Н.И.” фермер хўжалигига ижара ҳуқуқи асосида ажратилган ер майдонини ҳамда иссиқхона иншоотини МЧЖга ажратилган кредитнинг гаров таъминоти сифатида қабул қилинишига эришиб, жами 3,2 миллиард сўм кредит маблағини нақдлаштириб олиб ўзлаштиргани аниқланган.
Шу каби, департаментнинг Бойсун туман бўлими томонидан ўтказилган терговга қадар текширувда “Б.Й.” МЧЖ раҳбари Ф.Б. 7 нафар фуқарога ҳудудий тижорат банки филиалидан ажратилган 202 миллион сўм имтиёзли кредит маблағларини нақдлаштириб олгани, шунингдек 122,8 миллион сўм солиқни тўлашдан бўйин товлаб келгани аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Аввалроқ Бухорода фермер хўжалиги сохта ҳужжатлар орқали 420 минг доллардан ортиқ кредит маблағини ўзлаштириб юборгани аниқлангани тўғрисида хабар берилганди. Шунингдек, Сурхондарё вилоятининг Олтинсой ва Термиз туманларида 11 миллиард сўмдан ортиқ кредит маблағларини ўзлаштирган МЧЖ раҳбарлари аниқланганди. Шунингдек, Сурхондарё ва Фарғонада оилавий корхона раҳбарлари 1,2 миллиард сўмдан ортиқ имтиёзли кредитларни талон-торож қилганди.
Изоҳ (0)