Toshkent shahri va Navoiy viloyatida noqonuniy ravishda valyuta ayirboshlash bilan shug‘ullanib kelgan shaxslar ushlandi. Bu haqda Bosh prokuratura huzuridagi departament xabar berdi.
Ma’lum qilinishicha, departamentning Mirobod tuman bo‘limi tomonidan IIB xodimlari bilan hamkorlikda tezkor tadbir o‘tkazilgan. Tadbirda valyuta ayirboshlash bilan shug‘ullanib kelgan I.B., N.T. va E.M. fuqaro A.A.ga jami 5 ming dollarini 62,1 million so‘mga sotgan vaqtida ushlanib, ularning yonidan 17,7 million so‘m, 5 ming Rossiya rubli va 25 dollar ashyoviy dalil sifatida olingan.
Shu kabi, departamentning Navoiy viloyat boshqarmasi va IIB xodimlari hamkorligida Qiziltepa tumanida o‘tkazilgan tezkor tadbirda valyuta ayirboshlash bilan shug‘ullanib kelgan B.X. jami 6 ming dollarni fuqaro N.F.ga 74,7 million so‘mga sotgan vaqtida ushlanib, uning yonidan 3,3 ming dollar ashyoviy dalil sifatida olingan.
Xuddi shunday Navoiy shahrida valyuta ayirboshlash bilan shug‘ullanib kelgan F.Q. fuqaro Sh.H.ga jami 5,5 ming dollarni 68,4 million so‘mga sotgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Andijon va Qashqadaryo viloyatlarida valyuta qimmatliklarini noqonuniy muomalaga kiritilishiga chek qo‘yilgani to‘g‘risida xabar berilgandi.
Izoh (0)