Florida gubernatori va respublikachi Ron Desantis prezidentlik kampaniyasini to‘xtatdi. Bu haqda Desantisning o‘zi X (sobiq Twitter) ijtimoiy tarmog‘idagi sahifasida e’lon qildi. Siyosatchi o‘z tarafdorlarini Donald Trampga ovoz berishga chaqirdi.
15-yanvar kuni Ayova shtatidagi kokuslarda Desantis 21 foiz ovoz bilan ikkinchi o‘rinni egallagan edi, Trampga esa 51 foiz saylovchilar ovoz bergan. 20-yanvar kuni siyosatchi rejalashtirilgan intervyularni bekor qildi, keyingi kuni esa u 23-yanvarda praymeriz bo‘lib o‘tadigan Nyu-Xempshir shtatida miting o‘tkazmaslikka qaror qildi.
Desantis 2023-yilda Respublikachilar partiyasidan nomzodlikka Donald Trampning asosiy raqibi hisoblangan. Siyosatchi o‘z nomzodini 24-may kuni rasman e’lon qilgan, ammo shundan keyin obro‘sini yo‘qotishni boshlagan: Desantis o‘zining ommaviy chiqishlari va Trampga “hujum qilishni” istamagani uchun tanqid qilindi, yozda esa kampaniya moliyalashtirishda taqchillikka duch keldi va shtab boshlig‘ini almashtirishga to‘g‘ri keldi. O‘zining eng yuqori cho‘qqisida Desantisning reytingi 30 foizdan oshdi, ammo so‘nggi oylarda 10 foizga tushdi.
Praymeriz boshlanishi arafasida respublikachilar orasida AQSHning BMTdagi sobiq elchisi Nikki Xeyli ikkinchi o‘rinni egallab turibdi.
Sobiq prezident Donald Tramp Respublikachilar partiyasining praymerizda yaqqol favorit hisoblanadi. U Ayova shtatidagi kokuslarda ko‘p ovoz bilan g‘alaba qozondi va so‘rovlarda Nyu-Xempshirda yetakchilik qilmoqda.
Izoh (0)