Qashqadaryo viloyatining Chiroqchi tumanida bir kunda aholiga 110 xonadonli ko‘p qavatli uy, yangi oilaviy poliklinika binosi foydalanishga topshirildi. Kam ta’minlangan oilalarning 14 nafar farzandiga xatna to‘yi qilib berildi. Bu haqda “Daryo”ga tuman hokimligi axborot xizmati rahbari Sobit Abdunaimov xabar berdi.
Tadbirda so‘z olgan tuman hokimi Fayzulla Yusupov viloyatda maydoni bo‘yicha kichik, aholi zichligi bo‘yicha peshqadam bo‘layotgan tumanda ko‘p qavatli turar joylar fuqarolarning uylarga bo‘lgan ehtiyojini qondirishini ta’kidlagan.
“Sarbon shaharchasi” mas’uliyati cheklangan jamiyat tomonidan 18 milliard mablag‘ evaziga 1 gektar yer maydonida bunyod etilgan mazkur turar joylarda tumandoshlarimiz uchun barcha sharoitlar muhayyo qilingan. Bolalar maydonchasi, keng va yorug‘ xonalar, issiqlik tizimi, xullas, barcha-barchasi talab darajasida. Bir so‘z bilan aytganda, ushbu marosim haqiqiy tantanaga aylanib ketdi, — deydi hokimlik axborot xizmati rahbari.
Ta’kidlanishicha, tumanda yashovchi saxovatpesha tadbirkor Abdug‘ani Turdiyev hamda tuman hokimligi ko‘magida ijtimoiy himoyaga muhtoj oilalarning 14 nafar farzandi uchun xatna to‘y qilib berilgan.
Tadbir avvalida tuman hokimi Fayzulla Yusupov so‘zga chiqib, sunnat to‘ylari o‘tkazilayotgan bolajonlar va ularning ota-onalariga ezgu tilaklarini bildirgan.
“Shunday to‘ylarga yetkazganiga shukr, juda ham xursandmiz. Bugun bizni oilaviy holatimizni inobatga olishib, to‘ylar qilib berishib, bizni quvontirgani uchun mas’ullarga mingdan ming rahmat aytamiz. Nasib bo‘lsa farzandlarimiz hokim buvamiz va saxovatpesha tadbirkorlarimizdek yetuk inson bo‘lishini tilab qolamiz”, — deydi to‘y bolalardan birining onasi Mavluda Haydarova.
Chiroqchi tumanining “Yangiqishloq” mahallasida qad rostlagan 58-oilaviy poliklinikaning qishloq filiali binosi hamda “Navoiy” mahallasidagi xususiy klinikaning foydalanishga topshirilishi odamlar quvonchiga sabab bo‘lgan.
Markaz zamonaviy tibbiy jihozlar bilan jihozlangan va malakali shifokorlar jalb qilingan bo‘lib, asosiy maqsad kasalliklarni erta aniqlash, bemorlarning sog‘ligini saqlab qolish va ularga qulaylik, shinamlik yaratishdir. Ushbu maskan tuman aholisi uchun yana bir sovg‘a bo‘ldi desak adashmagan bo‘lamiz. Sababi 2024-yilning birgina yanvar oyida ikkinchi tibbiyot muassasasi foydalanishga topshirildi.
Besh qavatli, ko‘p tarmoqli mazkur xususiy klinika, tadbirkor Abdug‘ani Turdiyevning sa’y-harakatlari bilan 7 milliard so‘mdan ziyod mablag‘ evaziga bunyod etildi. Klinikada Xitoy, Rossiya, Koreya davlatlarida ishlab chiqarilgan eng so‘ngi rusumdagi 26 turdagi tibbiy apparatura va laboratoriya jihozlari bilan ta’minlangan. Muassasada 12 nafar ortiq oliy toifali shifokor hamda 26 nafar hamshiralar sifatli tibbiy xizmat ko‘rsatadi, — deydi mas’ullar.
Qo‘shimcha qilinishicha, xususiy klinikaning ishga tushirilishi hisobiga 35 ta yangi ish o‘rni yaratilgan bo‘lsa, bu ko‘rsatkichni olti oyda 60 taga yetkazish ko‘zda tutilgan.
Izoh (0)