Toshkentning Mirzo Ulug‘bek tumanida yangi qurilayotgan turar joy kompleksi hududida xonadon egalari majburan ko‘chirilayotgani haqida xabar berilgan edi. Tuman hokimligi holat yuzasidan munosabat bildirdi.
Ushbu holat tuman hokimligi matbuot xizmati tomonidan atroflicha o‘rganildi. Aniqlanishicha, Plitindustrybuilding turk kompaniyasi tomonidan Mirzo Ulug‘bek tumanining Qori Niyoziy va Lashkarbegi ko‘chalarining oralig‘ida Akay City ko‘p qavatli turar joy va savdo kompleksi qurilayotgan bo‘lib, shu sababli, Qori Niyoziy ko‘chasi, 25 uy manzilida fuqaro Ch.Rasulovga tegishli bo‘lgan turar joy binosi va qo‘shimcha qurilmalarning buzilishi, buning uchun Plitindustrybuilding tomonidan kompensatsiya to‘lanishi ko‘zda tutilgan.
Kompensatsiya qiymatini aniqlash bo‘yicha kompaniya vakillari va Ch.Rasulov o‘rtasida vujudga kelgan kelishmovchiliklar sababli, ushbu masala 2021-yilning mayida Fuqarolik ishlari bo‘yicha Mirzo Ulug‘bek tumanlararo sudi tomonidan ko‘rib chiqilgan. Sud qaroriga ko‘ra kompaniya keltirilayotgan zararni 2 milliard so‘m qiymatida qoplashi kerak bo‘lgan. Keyinchalik Ch.Rasulovning shikoyatlari Toshkent shahar va Oliy sud tomonidan apellyatsiya va kassatsiya tartibida ko‘rib chiqilgan, biroq tumanlararo sudning qarori o‘zgarishsiz qolgan.
Bundan so‘ng, sud qaroriga muvofiq 2 milliard so‘mlik komensatsiya MID tomonidan ko‘rsatilgan ko‘chmas mulkning oltin nafar egasi orasida taqsimlangan. Xususan, Ch.Rasulovning sobiq xotiniga – 50 foiz (1 milliard so‘m), Ch.Rasulov, uning ukasi, ukasining xotini, shuningdek, fuqarolar A.Sultonxo‘jayev va N.Ziyoxo‘jayevalarga mol-mulkning umumiy qiymatidan 10 foizdan (200 million so‘mdan) berilishi ko‘zda tutilgan.
O‘z navbatida, bu summaga rozi bo‘lmay, umumiy maydoni 350 metr kvadrat bo‘lgan buzilayotgan turar joy binosi va qurilmalar uchun bir nechta teng qiymatli kvartiralar berilishini talab qilmoqda.
O‘tkazilgan tekshiruv choralari ko‘rsatishicha, Toshkent shahar hokimining 2015-yil 31-dekbardagi qaroriga ko‘ra, 1,6 gektarlik maydon buzilayotgan bino-inshootlar egalariga kompensatsiya to‘lash sharti bilan Plit industry building kompaniyasiga ajratilgan.
Yuqorida ko‘rsatilgan manzilda joylashgan turar-joy va qurilmalarning umumiy maydoni 400 metr kvadrat bo‘lib, ular Ch.Rasulov va uning sobiq xotini o‘rtasida birgalikda orttirilgan mulk sifatida taqsimlangan.
2020-yilning martida notarial tasdiqlangan hadya shartnomasiga muvofiq Ch.Rasulov o‘ziga tegishli bo‘lgan ko‘chmas mulk qismini 5 qismga — o‘zi, ukasi, ukasining xotini, A.Sultanxodjayev va N.Ziyoxo‘jayevalar o‘rtasida, har biriga 10 foizdan taqsimlab chiqqan.Hozirgi kunda, ajratilgan kompensatsiyaning umumiy qiymatidan 1 milliard so‘mi Ch.Rasulovning sobiq xotiniga, 400 mln so‘mi fuqarolar A.Sultanxodjayev va N.Ziyoxo‘jayevaga berilgan.
Shu bilan birga, Ch.Rasulovning noroziligi sababli, unga, uning ukasi va ukasining xotiniga tegishli bo‘lgan 600 million so‘m MIBning depozit raqamida saqlanmoqda.
Qurilish maydonini tezroq bo‘shatish maqsadida, Plit industry building sud qaroriga muvofiq ajratilgan 2 milliard so‘mdan tashqari Ch.Rasulovga 117 metr kvadrat maydonli, bahosi 150 ming dollar qiymatga ega kvartira taklif qilgan, lekin Ch.Rasulov bu taklifni rad etgan.
Bugungi kunda sud qarori tuman MIB tomonidan ijro etilishi va fuqaroning mol-mulkini ko‘chirish, hamda ehtiyot chorasi sifatida noqulay ob-havo sharoitida buyumlar uchun mo‘ljallangan saqlash xonasiga (konteyner) joylash nazarda tutilgan.
“Yuqoridagilardan kelib chiqib, noqulay ob-havo sharoitini hisobga olgan holda, tadbirkorga fuqaro ko‘chib chiqishi uchun ma’lum bir muddat berishni tavsiya qilamiz. Shuningdek, tadbirkorlik subyekti va fuqarolar imkon qadar murosaga kelishlarini so‘rab qolamiz”, — deyiladi hokimlik xabarida.
Izoh (0)