Куни кеча Оила ва хотин-қизлар қўмитасида Янги Ўзбекистон университетининг бир гуруҳ аълочи, ижтимой фаол талаба қизларининг қўмита раиси билан юзма-юз мулоқоти бўлиб ўтди.
Мулоқот давомида талабалар Оила ва хотин-қизлар қўмитаси ҳамда унинг ҳудудий бўлинмалари томонидан амалга оширилаётган ишлар, айниқса, хотин-қизларнинг ижтимоий-сиёсий фаоллигини ошириш, уларни олий таълимга қамраб олиш, эҳтиёжманд оилаларнинг қизларига давлат томонидан яратилган имтиёзларнинг амалий натижалари, аёллар бандлигини таъминлаш борасида амалга оширилаётган ишларга қизиқиш билдириб, саволларига жавоб олдилар.
Қўмита раиси О.Парпибоева томонидан таъкидланганидек, кейинги йилларда мамлакат ҳаётининг барча жабҳаларида хотин-қизлар фаоллигини ошириш, уларнинг таълим ва касбий кўникмалар олиши ҳамда бандлигини таъминлашга ҳар томонлама кўмаклашиш, тадбиркорлик ташаббусларини янада қўллаб-қувватлаш, бир сўз билан айтганда, аёлнинг чинакам бахтли яшаши учун, интеллектуал ва маънавий юксалиши, касбий ҳамда оилавий мажбуриятларни уйғун тарзда бажариши каби имкониятлар йўлида кенг қамровли давлат сиёсати амалга оширилмоқда.
Хотин-қизларнинг ижтимоий-сиёсий фаоллигини ошириш йўналишида эътирофга молик ўзгаришлар юз берди. Жумладан, шаҳар, туман ҳокими, вазир, элчи каби масъулиятли лавозимларга аёллар тайинланди. Аёлларнинг бошқарув соҳаларидаги улуши 33 фоизга, тадбиркорлик соҳасида 35 фоизга, сиёсий партияларда 44 фоизга, олий таълимда 47 фоизга етди.
Аёлларнинг соҳалардаги улуши ҳам ортди. Улар тиббиёт тизимида 77 фоиздан кўпроқни, таълим соҳасида салкам 74 фоиз, савдода 49 фоиз, иқтисодиёт тармоқлари, саноат ва ишлаб чиқаришда қарийб 46 фоиз, маданият ва спортда 45 фоиз, қишлоқ хўжалигида 42 фоиздан зиёдни, молия ва суғурта фаолиятида 37 фоиздан ортиқни, ахборот ва алоқа хизматида 35 фоиз, профессионал, илмий ва техник фаолиятда қарийб 34 фоизни, давлат бошқаруви ва мудофаа тизимида 27 фоиздан кўпроқни ташкил этмоқда.
Ижтимоий, иқтисодий ва сиёсий соҳаларда хотин-қизлар ҳамда эркаклар учун тенг ҳуқуқ ва имкониятлар таъминлаш мақсадида мамлакатимизда қабул қилинаётган ҳар бир норматив-ҳуқуқий ҳужжат лойиҳасини гендер ҳуқуқий экспертизасидан ўтказиш йўлга қўйилди. Жаҳон банкининг Аёллар, бизнес ва қонун индексида Ўзбекистон хотин-қизлар ҳуқуқлари ва гендер тенглик бўйича аҳамиятга молик ислоҳотларни амалга оширган давлатлар қаторига киритилди.
Ҳар йили эҳтиёжманд оилалар фарзанди бўлган хотин-қизлар давлат гранти (2000 та квота) асосида олий таълим муассасаларга ўқишга қабул қилиб келинмоқда.
Мутахассислиги бўйича камида 5 йил меҳнат стажига, лекин олий маълумотга эга бўлмаган 500 нафар хотин-қиз ҳар йили Оила ва хотин-қизлар давлат қўмитаси тавсияномаларига асосан давлат ОТМларига тест синовлари натижаларига мувофиқ контракт асосида ўқишга қабул қилинмоқда.
Давлат олий таълим муассасаларининг магистратура босқичида ўқиётган барча хотин-қизларнинг контракт тўловлари қоплаб берилиши ва бунга ҳар йили камида давлат бюджетидан 200 миллиард сўм ажратиб борилмоқда.
Олий таълим муассасалари, техникум ва коллежларда, сиртқи ва кечки таълимда ўқиётган хотин-қизлар контрактларини тўлаш учун 7 йилга фоизсиз кредит бериш тизими жорий этилди.
Муҳтож ёлғиз аёллар ва боқувчисини йўқотган қизларнинг олий таълимдаги контракт-тўловлари қоплаб берилмоқда.
Давлат илмий ташкилотлари ёки олий таълим муассасалари докторантурасига фақат хотин-қизлар учун ҳар йили 300 тадан мақсадли квота ажратиб борилмоқда.
Мамлакатимизда хотин-қизлар учун яратилган бу каби имтиёзлар ва қўлга киритилаётган ютуқлар қамрови жуда кенг. Бироқ янги давр Оила ва хотин-қизлар қўмитаси олдига ҳам ўта муҳим залворли вазифалар қўймоқда.
Ўзбекистон Республикаси президентининг 2023 йил 21 декабрдаги “Оила ва хотин-қизлар қўмитасининг фаолиятини такомиллаштиришга оид қўшимча чора-тадбирлар тўғрисида” ги 208-сон фармони ҳамда “Оилаларни мустаҳкамлаш ва хотин-қизларнинг фаоллигини ошириш бўйича қўшимча чора-тадбирлар тўғрисида”ги 401-сон қарори муҳим воқелик бўлди. Шунинг билан бирга, қўмита олдига ўта муҳим ваколат ва масъулиятли вазифалар белгилаб берилди.
Қўмита томонидан режалаштирилган жорий мақсад ва вазифалар ҳам талабалар томонидан қизиқиш билан қабул қилинди.
Учрашув сўнгида талабаларнинг қўмита ва унинг ҳудудий тузилмаларида, қолаверса, маҳаллаларда волонтёр сифатида ҳамкорлик қилиши бўйича таклифлар муҳокама қилинди.
Изоҳ (0)