2024-yil 16-17-yanvar kunlari O‘zsanoatqurilishbank vakillaridan iborat delegatsiya Vena shahrida bo‘lib o‘tgan “Euromoney” forumida ishtirok etdi. Forum doirasida Bank masʼullari Avstriya Taraqqiyot banki, Raiffeisenbank (Avstriya), Societe Generale (Fransiya), Commerzbank, Helaba Landesbank Baden-Wuerttemberg, DZ Bank (Germaniya) hamda OPEK Xalqaro taraqqiyot jamg‘armasi vakillari bilan uchrashuv va muzokaralar o‘tkazdi.
Uchrashuvlar davomida O‘zsanoatqurilishbank va Yevropa banklari o‘rtasidagi ko‘p yillik hamkorlik ahamiyati qayd etilib, Bankning 2023-yilda erishgan natijalari xususida axborot berildi, joriy 2024-yildagi rejalar, xususan, chet ellik hamkorlar bilan aloqalarni mustahkamlashga qaratilgan chora-tadbirlar muhokama qilindi. Xalqaro kapital bozorlaridan moliyaviy resurslarni jalb qilishda amaliy hamkorlik istiqbollari, yashil moliyalashtirishni yanada kengaytirish, ESG tamoyillarini amalga tatbiq etish masalalari ko‘rib chiqildi.
Forum doirasida, O‘zsanoatqurilishbank tomonidan umumiy qiymati 75 mln. yevroga teng ikkita shartnoma, jumladan, “Landesbank Baden-Wuerttemberg” (LBBW) bilan 50 mln. yevro investitsiya loyihalarni moliyalashtirish to‘g‘risida, “Raiffeisenbank” bilan miqdori 25 mln. yevroga teng savdoni kreditlash bo‘yicha kelishuvlar imzolandi.
Taʼkidlash kerakki, mazkur kelishuvlar mamlakatimiz iqtisodiyotiga qo‘shimcha qiymatga ega tarmoqlarni moliyalashtirish uchun yangi imkoniyatlar yaratish barobarida O‘zbekiston va Yevropa Ittifoqi o‘rtasidagi moliyaviy hamkorlikning yanada mustahkamlanishiga xizmat qiladi.
Maʼlumot uchun. “Euromoney” forumi Markaziy va Sharqiy Yevropa davlatlaridagi moliya bozori ishtirokchilari uchun muhim tadbir bo‘lib, 29 yildan beri muvaffaqiyatli o‘tkazib kelinmoqda. Har yili 1000 dan ortiq emitentlar, investorlar, vositachilar va siyosatchilarni o‘zida jamlaydigan mazkur forum yangi aloqalarni o‘rnatish, mavjud hamkorlikni mustahkamlash hamda istiqbolli rejalar tuzishda muhim amaliy platforma hisoblanadi.
Reklama huquqi asosida.
Izoh (0)