2024 йил 16-17 январь кунлари Ўзсаноатқурилишбанк вакилларидан иборат делегация Вена шаҳрида бўлиб ўтган “Euromoney” форумида иштирок этди. Форум доирасида Банк масъуллари Австрия Тараққиёт банки, “Raiffeisenbank” (Австрия), “Societe Generale” (Франция), “Commerzbank”, “Helaba”, “Landesbank Baden-Wuerttemberg”, “DZ Bank” (Германия) ҳамда ОПЕК Халқаро тараққиёт жамғармаси вакиллари билан учрашув ва музокаралар ўтказди.
Учрашувлар давомида Ўзсаноатқурилишбанк ва Европа банклари ўртасидаги кўп йиллик ҳамкорлик аҳамияти қайд этилиб, Банкнинг 2023 йилда эришган натижалари хусусида ахборот берилди, жорий 2024 йилдаги режалар, хусусан, чет эллик ҳамкорлар билан алоқаларни мустаҳкамлашга қаратилган чора-тадбирлар муҳокама қилинди. Халқаро капитал бозорларидан молиявий ресурсларни жалб қилишда амалий ҳамкорлик истиқболлари, яшил молиялаштиришни янада кенгайтириш, ESG тамойилларини амалга татбиқ этиш масалалари кўриб чиқилди.
Форум доирасида, Ўзсаноатқурилишбанк томонидан умумий қиймати 75 млн. еврога тенг иккита шартнома, жумладан, “Landesbank Baden-Wuerttemberg” (LBBW) билан 50 млн. евро инвестиция лойиҳаларни молиялаштириш тўғрисида, “Raiffeisenbank” билан миқдори 25 млн. еврога тенг савдони кредитлаш бўйича келишувлар имзоланди.
Таъкидлаш керакки, мазкур келишувлар мамлакатимиз иқтисодиётига қўшимча қийматга эга тармоқларни молиялаштириш учун янги имкониятлар яратиш баробарида Ўзбекистон ва Европа Иттифоқи ўртасидаги молиявий ҳамкорликнинг янада мустаҳкамланишига хизмат қилади.
Маълумот учун. “Euromoney” форуми Марказий ва Шарқий Европа давлатларидаги молия бозори иштирокчилари учун муҳим тадбир бўлиб, 29 йилдан бери муваффақиятли ўтказиб келинмоқда. Ҳар йили 1000 дан ортиқ эмитентлар, инвесторлар, воситачилар ва сиёсатчиларни ўзида жамлайдиган мазкур форум янги алоқаларни ўрнатиш, мавжуд ҳамкорликни мустаҳкамлаш ҳамда истиқболли режалар тузишда муҳим амалий платформа ҳисобланади.
Reklama huquqi asosida.
Изоҳ (0)