Rossiya Tergov qo‘mitasining Boshqirdiston Respublikasi bo‘yicha tergov boshqarmasi Baymak shahrida sodir bo‘lgan ommaviy tartibsizliklardan keyin Rossiya Jinoyat kodeksining ikki moddasi bo‘yicha jinoiy ish qo‘zg‘atdi.
Rossiya Tergov qo‘mitasi rasmiy Telegram-kanalida eʼlon qilgan maʼlumotlarga ko‘ra, Baymakdagi ommaviy tartibsizliklardan so‘ng “Ommaviy tartibsizliklarni tashkil etish va unda ishtirok etish” hamda “Hokimiyat vakiliga nisbatan zo‘ravonlik qo‘llash” moddalari bo‘yicha jinoiy ish ochilgan.
RF Tergov qo‘mitasi ma’lum qilishicha, ijtimoiy tarmoq va messenjerlarda Boshqirdiston aholisini Baymakskiy tuman sudi yaqinida norozilik aksiyasi tashkil etishga chaqiriqlar tarqalgan. To‘polonlarga terrorchilar va ekstremistlar ro‘yxatiga kiritilgan bloger Fail Alchinov ustidan o‘tkazilgan sud jarayoni sabab bo‘ldi. Muvofiqlashtirilmagan namoyish ishtirokchilari Alchinovni ozod qilishni talab qildi. Ular politsiya bilan to‘qnashdi.
“Zo‘ravonlik, jumladan, qurol sifatida foydalanilgan buyumlarni qo‘llash bilan kechgan ommaviy tartibsizliklar chog‘ida bir necha kishi, xususan, huquq-tartibot idoralari xodimlari ham tan jarohati oldi”, — deyiladi Rossiya Tergov qo‘mitasi xabarida.
“RIA Novosti” xabariga ko‘ra, bloger Fail Alchinov nafrat va adovat qo‘zg‘aganlikda ayblanib, to‘rt yilga ozodlikdan mahrum etilgan. 2023-yil aprel oyida qishloqlardan birida bo‘lib o‘tgan yig‘ilishda u kavkazliklar, armanlar va Markaziy Osiyo davlatlaridan kelgan odamlarni haqoratlab, nutq so‘zlagan.
Boshqirdiston politsiyasi tartibsizliklarni bostirish uchun ko‘zni yoshlatuvchi gaz va shovqinli granatalardan foydalangan. “TASS” xabariga ko‘ra, respublika prokuraturasi Baymakdagi to‘qnashuvlarda jabrlanganlar uchun ishonch telefoni tashkil qilgan.
Izoh (0)