Toshkent viloyati Bo‘ka tumanining hokimi Nizomiddin Abbosov sog‘lig‘i yomonlashgani tufayli o‘z arizasiga binoan lavozimidan ozod etildi. Bu haqda O‘zA xabar berdi.
Viloyat hokimligining ma’lum qilishicha, Begmatov Baxtiyor Paxriddinovich Xalq deputatlari Bo‘ka tumani kengashining qarori bilan tuman hokimi etib tayinlandi. Baxtiyor Begmatov 1976-yili Toshkent viloyati Parkent tumanida tug‘ilgan. Ma’lumoti — oliy, 1998-yil Toshkent davlat iqtisodiyot universiteti, 2001-yil Prezident huzuridagi davlat va jamiyat qurilishi akademiyasini tamomlagan.
U faoliyati davomida Nurafshon shahar hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari, Toshkent viloyati Mahalla va nuroniylarni qo‘llab-quvvatlash boshqarmasi boshlig‘i lavozimlarida ishlagan.
Tayinlovga qadar u Toshkent viloyati Kambag‘allikni qisqartirish va bandlik bosh boshqarmasi boshlig‘i o‘rinbosari — mahallabay ishlash va tadbirkorlikni rivojlantirish boshqarmasi boshlig‘i lavozimida ishlab kelayotgan edi.
Izoh (0)