Самарқандда икки нафар солиқ инспекцияси ходими пора олганликда айбланиб, судланди. Бу ҳақда “Замон” информацион дастурида маълум қилинди.
Суд ҳужжатларига кўра, Самарқанд тумани солиқ инспекцияси ходими Булунғур туманида тадбиркорлик билан шуғулланувчи фуқарога корхонасининг солиқ базасида жисмоний шахслардан олинадиган даромад ва ижтимоий солиқлардан асоссиз ҳисобланган қарздорликни камайтиришда ёрдам беришини айтган.
Солиқчи ушбу “хизмати” эвазига 1000 доллар талаб қилган. Шундан сўнг у тадбиркорнинг 300 миллионга яқин солиқ ва пеня қарздорлигини камайтиришда Булунғур тумани солиқ инспекциясида камерал солиқ текширувлари шўбаси бошлиғи лавозимида ишловчи танишини шерик қилган.
Солиқчи Самарқанд шаҳридаги кафелардан бирида тадбиркордан 500 доллар олаётганда ашёвий далиллар билан ушланади.
Жиноят ишлари бўйича Самарқанд шаҳар судида ўтказилган суд мажлисида солиқ ходимларига ҳукм ўқилган. Уларнинг иккаласи ҳам Жиноят кодексининг 210-моддаси (Пора олиш) 2-қисми “в” банди билан айбдор деб топилиб, 5 йилга озодликдан маҳрум қилинган.
Аввалроқ Самарқандда икки нафар ҳоким ёрдамчиси 1000 доллар пора билан қўлга тушгани тўғрисида хабар берилганди.
Изоҳ (0)