Toshkent shahrining Uchtepa tumanidagi “Arzon dorixona” MCHJga qarashli dorixona litsenziyasi bekor qilindi. Bu haqda Sog‘liqni saqlash vazirligi huzuridagi “Farmasevtika mahsulotlari xavfsizligi markazi” davlat muassasasi xabar berdi.
Ma’lum qilinishicha, fuqaroning mazkur dorixona haqidagi murojaati farmatsevtika faoliyatini litsenziyalash boshqarmasi mutaxassislari tomonidan o‘rganib chiqilgan.
Toshkent shahrining Uchtepa tumanidagi “Arzon dorixona” MCHJga tegishli dorixonada tekshiruv o‘tkazilganda 25 turdagi dori vositasi tibbiyot amaliyotida qo‘llanilishiga ruxsat etilgan dori vositalari, tibbiy buyumlar va tibbiy texnika davlat ro‘yxatidan o‘tmaganligi hamda ushbu dori vositalarining muvofiqlik sertifikati mavjud emasligi aniqlangan. Yuqoridagi holat bo‘yicha, Farmasevtika mahsulotlari xavfsizligi markazining Toshkent tumanlararo iqtisodiy sudiga kiritgan da’vo arizasi — “Arzon dorixona” MCHJga 2020-yil 9-sentyabr kuni berilgan 1010-sonli litsenziyani bekor qilish to‘g‘risidagi so‘rovi sudning tegishli hal qiluv qarori bilan qanoatlantirildi. Hamda “Arzon dorixona” MCHJga berilgan litsenziya bekor qilindi, — deyiladi mas’ullar izohida.
Mas’ul tashkilotning eslatishicha, “Dori vositalari va farmasevtika faoliyati to‘g‘risida”gi qonunning 20-moddasiga muvofiq sifatsiz, qalbakilashtirilgan, O‘zbekiston Respublikasida ro‘yxatdan o‘tkazilmagan dori vositalarini va tibbiy buyumlarni, shuningdek O‘zbekiston Respublikasida ro‘yxatdan o‘tkazilgan dori vositalarining g‘ayriqonuniy nusxalarini xarid qilish, chakana realizatsiya qilish va ulardan foydalanish taqiqlanadi.
Izoh (0)